Kulturilerinermi piujuaannartitsineq

Kalaallit Nunaanni NAPA Nunat Avannarliit ataanni kisiartaalluni suliffeqarfiuvoq. Tamanna pisussaaffeqartitsivoq, aamma periarfissiilluni.

Suliassaraagut:

Silap pissusaata allanngorneri unitsillik!

Nunat Peqatigiit piujuartitsineq pillugu anguniagaa 13

Kulturip inuit isumaat iliuusaallu sunnertarpai. Uagut kulturilerinermi suliniutit inunnik sunniisartut aningaasaliiffigalugit suleqataavugut. Issittumi aamma inuit kulturiminni ukiuni tuusintilikkaani pinngortitamut issittorsuarmut sakkortuumullu naleqqussartarsimapput aamma piujuartitsisunik aaqqiissuteqartarsimallutik. Issittut avannarliit mianernarput aamma Issittuni avannarlerni silap pissusaata allanngoriartornerata kingunerisai ullut tamaasa takuneqarsinnaapput. NAPA-mi issittormiut paasinnittariaasiisa Nunani Avannarlerni tamani paasineqarnissaat akuerineqarnissaallu anguniarlugit sulivugut. Issittormiut piginnaasaannik Nunani Avannarlerni ataatsimoorfiusumut avitseqateqarnissarput anguniagaraarput.

Atuineq nioqqutissiornerlu akisussaassuseqartoq

Nunat Peqatigiit piujuartitsineq pillugu anguniagaa 12

Atuinikinnerulernissaq pineqarpoq. Kalaallit Nunaanni inuit illoqarfinni nunaqarfinniluunniit allaneersut naapinniarutsigit timmisartut, helikopterit umiarsuillu ilaaffigisariaqarpagut. Timmisartut allanik suleqateqarniarutta aamma inunnut allanut avatitsinneersunik piujuartitsiffiusunik atassuteqarniarutta pisariaqartippagut. Kisianni arlannut timmisartoraangatta arlalinnik suliaqartarnissarput qulakkeertarparput.

 

Tamanna aamma isumaqarpoq kulturilerisut arlaannut angalagaangata piffissami sivisunerusumi ornitaminniittarnissaannik kajumissaartarpagut. Imaassinnaavoq isiginnaartitsissutip takutinnerata saniatigut meeqqanut inuusuttunullu workshoppertitsisinnaasut. Imaassinnaavoq suleqatit ataatsimeeqatiginerisa saniatigut tusarnaartitsoqarsinnaasoq. NAPA-mi sulisut angalasarneri piareersarluarneqartarput annikinnerusunik aningaasartuuteqannginnissaq anguniarlugu. Ornitatsinni ataatsimi arlalinnik ataatsimeeqateqarniartarpugut. Attaveqarfiit ataatsimeeqatigisarnissaat aamma suleqatigisarnissaat piffissami angalaffitsinni pilersaarusiortarpagut.