NAPA nunani avannarlernut tatiginninneq annertusarniarlugu sulivoq.
Immitsinnut pilluta ilisimasaqarneq tatiginnilersitsisarpoq, uagullu Nunani Avannarlerni tamani issittormiut paasinnittariaasiannik siuarsaanissatsinnut pisariaqartitsineq annertooq takusinnaavarput.
Ulluinnarni Kalaallit Nunaanni nunat avannarlermiut allat kulturikkut ersiutaannik ingammik Danmarkimit misigisassaqarpoq. Nunani avannarlerni tamani issittormiunit annikinneerarsuarmik takussutissartaqarpoq paasisimasaqartoqarlunilu. Nunani avannarlerni ataatsimoorutaasumik oqaaseqanngilagut, ikittunnguillu kalaallisut ilinniartarput. Inuit kulturiat Skandinaviami ilisimaneqarpallaanngilaq aamma qallunaatsiaat naasorissaasuisa kulturiannit allaanerujussuulluni. Taamaattorli Nunani Avannarlerni issittumi nunat inoqqaavi imminnut «ilaqutariipput» tassa Issittumi inuugamik ataatsimut misilittagaat assingupput. Inuit kulturianni inuit ukiuni tuusintilikkaani pinngortitamut qanilluinnarlutik inuupput.
Nunat Avannarlermiut nunarsuarmi piujuartitsinerpaanngussagunik
paasinnittariaatsit assigiinngitsut paasisimasaqarfigissallugit annertuumik pisariaqartitsipput. Issittormiut paasinnittariaasiat ileqqutoqqat tunngavigalugit piujuartitsilluni inuuneqarnermut paasisimasaqalersitsisinnaavoq piginnaasaqalersitsillunilu. NAPA-p Kulturimut Tapiissuteqartarfik aqqutigalugu ilaatigut inuusuttut avatangiisit pillugit nutaanik isummanik ilungersuuteqarlutik isumalinnik suliniuteqartunullu aamma sanaluttarneq pillugu ileqqutoqqanik paasissutissiinernut tapiisarsimavoq.
NAPA susassaqarfiit akornanni sulivoq, taamaalillunilu Nunani Avannarlerni tamani issittormiut paasinnittariaasiisa paasineqarnissaannut akuerineqarnissaannullu taperseeqataalluni.
NAPA Kalaallit Nunaanni erseqqissumik suliniuteqartut ilagaat Kalaallillu Nunaanni nunat avannarlermiut soqutigisaat pillugit suleqataalluni.
Aaku 2021-mi suliniutit tapiiffigisimasatta imaluunniit nammineq suliaqarfigisimasatta ilaat:
Assersuutigalugu NAPA-p nunat avannarlermiut suleqatigiiffigisaat Nuuk International Film Festival (NIFF) peqataaffigisimavaa. NIFF aamma Namminersorlutik Oqartussat Kalaallit Nunaanni filimiortarnerup piujuartitsisumik aaqqissuusaalernissaannik suliaqarnerat tapersersorpaa.