NAPA-p suleqatit nutaat tikilluaqquai

NAPA-p assut nuannaarutigalugu oqaluttuarisinnaavaa Nina Paninnguaq Skydsbjerg siunnersortitut nutaatut atorfinitsissimagamiuk. Atorfimmut tassunga 23-t nunatsinniit qinnuteqarsimapput, Nina Paninnguaq Skydsbjergillu inuit amerlasuut pikkorissut akornanni atorfik pivaa.

Nina Paninnguaq Skydsbjergip siunnersortitut nunani avannarlerni aningaasaateqarfinnut qinnuteqaatit suliarissassavai, matumani NAPA-p kulturimut tapiisarfia ilanngullugu. Nina Paninnguaq Skydsbjergip innuttaasut, meeqqat inuusuttut inersimasullu kulturilerinermik suliaqarlutik suliniuteqartut qinnuteqaataat pillugit siunnersortassavai. Nina Paninnguaq Skydsbjerg siusinnerusukkut filmiliornermik suliffiuteqarsimasoq aamma filminik produceritut suliaqarsimasoq, taamaalillunilu nammineq NAPA-p kulturimut tapiisarfianut qinnuteqartut inissisimasarsimasoq atorfinitsissinnaagamiuk NAPA-p assorsuaq nuannaarutigaa.

Maasi Chemnitz NAPA-mi siullermik ukiup affani tusagassiortunngorniarluni ilinniarnerminut atatilullugu attaveqatigiinnermi suleqatitut suliffimmi misiliissaaq. Maasi Brøns Chemnitzip attaveqatigiinnermi suliassat assigiinngitsut suliarisassavai, ilaatigut oqaluttuat pitsaasut, nutaarsiassat, tusagassiutinut nalunaarutit aamma inuit akornanni attaveqaatti suliarisassallugit kiisalu Info Norden aamma sulinerani ikiortassallugu. Maasi Brøns Chemnitzip siusinnerusukkut NAPA-p inuusuttunik allannermik workshoppertitsilluni atuakkiornermillu unammitsisilluni suliniutigisimasaa ALLATTA peqataaffigisimavaa, NAPA-llu ALLATTA-p nutaamik nunat avannarliit killiit aallaavigalugit ingerlateqqinnissaanut suleqataanissaa assut nuannaarutigaa.

“Suleqatigut nutaat Nina Paninnguaq Skydsbjerg aamma Maasi Brøns Chemnitz tikilluaqqusinnaagatsigit assut nuannaarutigaarput, suleqatigiinnissarpullu taamatuttaaq qilanaareqalugu”, oqarpoq Anne Mette Gangsøy.