Attaveqaqatigiinnermi suleqataasoq ingerlariaqqilersoq

Bula Kulusumi Kitaamiunik angajoqqaaqarluni inunngorsimavoq, Ilisimatusarfimmillu Oqaasilerineq, Atuakkialerineq Tusagassiutilerinerlu Bacheloriuffigalugit. Bula sumiuunerluni aperineqaraangami akisarpoq kalaalliuni. Tassami Tunumi, Avannaani Kujataanilu najugaqarsimavoq. Ukiulli amerlanerit Nuummi najugaqarsimalluni.

NAPA-mi Bula attaveqaqatigiinnermi sulisuuvoq, aammali suliniutinik aqutsisuusarluni.

– 2000-p aallartinnerani eqqumiitsuliorneq kulturilu qitiutillugit sulisimavunga. Assut tamanna nuannarisimavara. Inngammik NAPA aqqutigalugu eqqumiitsuliortut kulturilerisullu attavigilluarlersimagakkit. Tamatuma saniatigut meeqqat inuusuttullu suliaqarfigissallugit nuannarilluartuuara, maanilu tamatumunnga periarfissaqarluarsimallunga, oqarpoq Bula.

Akisussaassuseqarneq tamatigoortoq

Bula NAPA-mi assigiinngisitaartunik suliaqarsimavoq. Ilaatigut assigiinngiiaartutitugt nutaarsiassalerineq suliarisimavaa, aamma KNR Radiop ullaakkut aallakaatitsisarnerani apersorneqartarluni, aamma paasissutissiinermik angalanerni peqataasarsimalluni.

– Nutaarsiassanik allaaserinnittarnerup, FB-mut nutaarsiassanik ikkussisarnerup, tusagassiutinullu nalunaaruteqartarnerup saniatigut nunatsinni paasissutissiiartoqataallunga angalangaatsiarsimavunga. Angalanitsinni inuttaasut qassinilluunniit ukiullit nunani avannarlerni periarfissaannik oqaluttuuttarsimavagut, assersuutigalugu Norden i skolen, Nordplus, Nordjobb aamma nunat avannarlerni aningaasaateqarfiit qinnuteqarfigineqarsinnassut pillugit. Aamma taakkununnga ilaavoq NAPA-p nammineq kulturimut tapiisarfia. Aamma suleqatima ilaat peqatigalugu tusagassiortunngorniat ilinniarnerminnut atatillugu suliffimmiitut kingulliit marluk praktikkerneranni ilitsersuisuusimavunga.

Bula attaveqaqatigiinnermi sulisunermi saniatigut NAPA-mi suliniutit arlallit suliarisarsimavai. Suliniutit aaqqissuussaakkajupput inuusuttut nunat avannarlermiut tamaneersut, aamma kalaallit inuusuttut peqataaffigisartagaat. Matumani SORLAK – nunatsinni meeqqat inuusuttullu siunnersuisoqatigiiffiat – aamma DUF – Dansk Ungdoms Fællesråd suleqatigalugit. Suliniummut assersuutaapput Nordens Unge i Bæredygtige Fællesskaber aamma siunissami suliniutaasussaq NORD, taakku inuusuttunut nunanit avannarlernit tamaneersunut sammisuupput. Taakku saniatigut naalagaaffeqatigiinnerup iluani suliniut aallartitussaq “Ungefællesskaber” nunatsinnit, Danmarkimit aamma Savalimmiunit peqataaffigineqartoq pillugu ataatsimiinnernut peqatasarluni. Tassunga DUF aamma suliniummik aqutsisuuvoq.

– Aamma NAPA ullaakkorsioqatigalugu nutaamik najoqqutassiuullugu suliniummut aqutsisuuvunga. Tassani kalaallit eqqumiitsuliortut, kulturilerisut, kulturimut politikeri ataasiakkaarlugit oqaloqatigineqassapput, immiunneqartassapput siaruarterneqartussanik. Tassani nunatsinni eqqumiitsuliortut kulturilerisullu suliaat atugaallu aamma nunatsinni kulturimut politikki eqqartorneqartassapput.

Attaveqaqatigiinnermi piginnaasat

Attaveqaqatigiinnermi suleqatitut Bula oqaatsit piginnaasaqarfigisariaqarpai, Bulalumi aamma pingasunik oqaaseqarpoq, kalaallisut, qallunaatut tuluttullu. Nutaarsiassalerigaangami piginnaasani taakku atungaatsiartarpai, nunanilu avannarlerni kulturilerisut assigiinngitsut attaveqaqatigisarlugit.

– Attaveqaqatigiinnermi suleqatip aamma nunat avannarliit akornanni tatigeqatigiinnerup annertusaaffiginissaanut aamma kulturit akornanni paaseqatigiinnissamut NAPA-p suliaqarneranut suleqataassaaq. Ilaatigut NAPA-p suliai pillugit ilisimasanik ingerlatsitseqqiisassaaq aamma suliai pillugit paasisimasaqalersitsisassalluni. Aamma paasisitsiniaalluta angalasarnitsinni meeqqat inuusuttullu sinnattui pillugit workshoppertittarsimavagut. Taamaattumik qassinilluuniit ukiullit attaveqatigisarsinnaaneri pingaaruteqartorujussuuvoq.

Bulap inuunerani pisussat nutaat

Bula NAPA-mi suliunnaassaaq 31. maj 2022. Danmarkimi namminersorluni nutserisunngorniarpoq. Taamaattumik inuunermini pisussat nutaat ingerlatilissavai, aammali Danmarkimi panini najugalik ilaquttanilu allat qanillissallugit.

Taamaattumik NAPA-p attaveqaqatigiinnermut sulisuanut paasissutissartat Bulap NAPA-mi taartissaa augustimi sulilerpat allanngorumaarput.