Siunissamut ikaartarfik
Nunani Avannarlerni Piorsarsimassutsikkut Attaveqaat – NAPA-p ukiorpaaluit inuusuttut namminneq ineriartorsinnaanissaannut periarfissanik tuniorartarsimavai. Periarfissat eqqumiitsuliornerminnaq atuutsinngillat, ilinniagaqarnermulli aamma attuummassuteqarlutik. Taamaammat NAPA ilinniartunutNuummi allaffeqarfitsinni praktikkersinnaanissamut periarfissiisarpoq.
NAPA suliffeqarfiuvoq assigiingitsunik kulturimut tunngasunik suliaqartartoq. Anguniakkatta akornanniippoq, kalaallit nunallu avannarlermiut allat kulturilerisut inuunerannik ineriatortitseqataanissaq, tapiisarneq uummarissaanerlu, meeqqanut unuusuttunullu suliniutit salliutillugit. Taamaammat allaffipput ammarsimavarput, ilinniartut tamaani praktikkersinnaalersillugit.
– Suliffeqarfitut ilinniagaqarnermut tapersersuinissamik ukkataqarpugut. Praktikkertoqarneq iluaqutaavoq, pratikkertup suliffeqarfiullu iluaqutigisinnaammassuk. Ilinniartut siunissami atorsinnaasaminnik ilikkagaqarsinnaapput, uagullu NAPA-miittugut nutaanik isumassarsitinneqarsinnaalluta. Aamma praktikkertoqarneq uaguttinnut iluaqutaalluarsinnaavoq, suliarisartakkagut pillugit nutaanik isumassarsisinneqarsinnaagatta, NAPA-mi pisortaq, Anne Mette Gangsøy oqarpoq.
NAPA praktikkerfittut
Aggustusi 2021-mi pisortap paarlaannerata nalaaniit siullerpaammik praktikkertoqalerpugut. Tassani Maasi Brøns Chemnitz Ilisimatusarfimmiit tusagassiortunngorniartupt periarfissaq tigulluarsimavaa.
– Ukiorpaaluit atuakkialerinermik suliaqarnikuugama kulturimut tunngasut soqutigisuaannarsimavakka. Taanna pillugu NAPA praktikkerfissatut toqqarnikuusimavara. Suleqatitaama aallaqqaataaniit ilassilluarpaanga. Suleqatikka nunat avannarliit assigiingitsuninngaanneermata, assigiingitsunillu tunuliaquteqarmata allaffiup iluani periuutsit allaanerulaartut takullugit aliikutaaqaaq, Maasi oqarpoq.
Maasi ukiorpaaluit Atuagkani sulisimavoq, ilinniarninilu naammassippat taakani sulinini nanginniarpaa. Nammineq isummani malillugu, piffissaq NAPA-mi atornikuusani siunissaaminut sinaakkutissiilluarnissaminut atorluarsinnaavaa.
– NAPA aqqutigalugu nittartakkat ineriartortinneri, qanoq atorneqartarnersut aamma qanoq assigiingitsigisinnaaneri pillugit ilikkagaqarnerulerpunga. Taanna siunissami atorsinnaassagakku tigulluarnikuuara. Praktikkernera aqqutigalugu aamma misigivunga inuttut nammineq imminut ilikkarnerullunga. Suliassat annertuallaaleraangata naammeersinnaaneq ilikkarnikuuara, attaveqaqatigiinnermullu suliniutit paasilluarnerulerpakka. Kisianni nuannernerpaasimavoq paasissutissiilluni angalermi ilaanikuuniga, aalimassa aallarteqqammernikuullunga. Misigisimasaq taana ilunniitittuaannassavara, Maasi oqarpoq.
Kultoori nunat avannarliilu pillugit immikkut ittumik suliaqarneq
Maannakkut NAPA-mi allaffitsinni nutaamik Ilisimatusarfimmiit tusagassiortunngorniamik praktikkertutaarpugut. Isabella Hindby Borg februaarip aallaqqaataani 2022-mi NAPA-mi praktikkernini aallartippaa, ukioq affaq Kommuneqarfik Sermersooq-mi attaveqaqatigiinnermi immikkoortortaqarfiani praktikkertareerluni.
– Kommunimi praktikkertareerlunga immikkut ittumik suliaqarnermik misileerusullunga misigisimavunga. Taamaammat NAPA toqqarpara. Kommuni assigiingitsunik suliaqartarpoq, suliassaq ataasiinaq isiginagu. Maani kultoorimut tunngavillit, nunat avannarlernilu suleqatigiinneq pillugit suliarisussaavakka. Aamma maani attaveqaqatigiinnerup iluani allattariarsorneruinnaangitsunik misilittagaqarsinnaavunga, NAPA-p nipi videollu atortarmagit,. ukioq affaq NAPA-miinnissani pissangageqalugu Isabella oqarpoq.
Tusagassiortutut praktikkernermini Isabella assigiingitsunik suliaqartartussaavoq, soorlu nittartakkamut nutaarsiassaliorneq, kulturimullu tapiisarfimmit NAPA-p suliniutit tapersersornikuusaaniit nutaarsiassaallammanik aamma allattartussaalluni. Aamma Info Nordenimiit attaveqaqatigiinnermut tunngasunik suliaqartartussaavoq.
Siumut ingerlariaqqiffissaq
– NAPA-mi qanorluunniit arlaatigut ikiuisinnaanissarput qilanaarisarparput. Taamaammat praktikkertoqartarneq ingerlatiinnarniarparput. Sutulluunniit ilinniartut maani akuerisarpagut. 2021-mi 2022-milu tusagassiortunngorniartut tigunikuuagut, suleqatigut pingasut tusagassiortutut ilinniarnikooriarmata. Taamaariarmat tusagassiortunngorniarlutik praktikkertuvut maaniinnerminni arlalinnik ineriartorluarsinnaaffigisaminnik periarfissaqarput, pisortaq oqarpoq.
Aamma NAPA-p matua ilinniartunut allanullu ammajuaannartarpoq, arlaannik oqaloqatiginnittoqarusuttunut. Apersuiartortoqarsinnaavoq aamma apersuineq ilinniarneq aqqutigalugu suliassamut atugassaasinnaalluni. Tapersersuerusuppugut. Uani apersuinissamut periarfissaq pillugu atuarnerusinnaavutit.
Nutaarsiassat takunngitsoorpigit?
UNLEASH Kalaallit Nunaat qinnuteqarfigineqarsinnaalerpoq
Ullut 20. aamma 27. august 2022 akornanni UNLEASH Nuummi nunap immikkoortuani pinngorartitsiffiliorniarpoq! Tassani inuusuttut piginnaanillit Issittormiut-Nunat Avannarlermiut 200-t 18-35-nik ukiullit katersuutissapput. Nunanit taakkuninnga tamanit inunnit ikiuisartunit ilisimasaqarluartunillu ikiorneqarlutit Piujuartitsilluni Ineriartortitsinissaq pillugu Nunarsuarmi anguniagassap anguneqarnissaanut pinngorartitsillutit nutaaliorlutit ineriartortitsisinnaavutit. Taakku saniatigut illit pilersaarutitit anguniarlugit eqimattani sulissaatit! UNLEASH
Pauliina Oinonen NAPA-mi pisortaagallartutut atorfinippoq
Pisortamik nutaamik atorfinitsitsisoqarnissaata tungaanut ingerlalluartumik ikaarsaariartoqarnissaa qulakkeerniarlugu, NAPA-mi pisortaagallartussamik toqqaanissaq aalajangerneqarpoq. Søren Würtz, NAPA-mi pisortaq, nalunaarpoq NAPA-mi atorfimminit apriilip 30-ani soraarniarluni. Pisortassamik nutaamik nassaartoqarnissaata tungaanut NAPA ingerlalluarnissaa qulakkeerniarlugu, Nunat Avannarliit Ministeriisa Siunnersuisoqatigiivisa Pauliina Oinonen pisortaagallartussatut toqqarsimavaat. Pauliina Finlandimeersoq januaarimi 2022-mi siunnersortitut NAPA-mi ilannguppoq. Taamanimiilli NAPA-p
NAPA pisortartaarpoq – Nina pisortatut atorfia Sørenimut ingerlatikkaa
Søren Würtz 2023-imiit NAPA-mi pisortanngulerpoq. Nina NAPA-mi sulilluarsimanera qujassutigaarput. Søren Würtz ukiortaami pisortanngoruni suliassat pisortaagallartumit Nina Paninnguaq S. Kristiansen-mit ingerlateqqinneqassapput. Naak Nina Paninnguaq S. KristiansenNAPA-mi uninniarnini nalunaarutiginikuugaluarlugu, pisortanngortussaq aallartilluarnissaanut ilinniartilluarnissaanullu piffisaqarluarumaarpoq. Nina namminersortutut sulileqqinniarluni aalajangiinikuuvoq. – Namminersortutut sulileqqinnissannut qamannga ilunnit aallutarileqqissallugu misigaara. NAPA-miinnera assut nuannarinikooqaara, tulluusimaarutigaaralu
NAPA-p meeqqat inuusuttullu Qeqertarsuup Tunuani naapinniarai
NAPA Qeqertarsuup Tunuanut piffissami 3. juni – 18. juni 2021 angalassaaq. NAPA-p atuarfiit ilaanni meeqqat inuusuttullu kiisalu ilinniartitsisut nunani avannarlerni periarfissaat pillugit oqaluttuutissavai kiisalu meeqqat sinnattui pillugit workshoppertissallugit. Innuttaasut piumasut kulturimik suliniutaat aamma NAPA-p kulturimut tapiisarfia pillugit katersortarfinni siunnersussavai. NAPA-p ammasumik siunnersuisarfia Tamassa innuttaat piumasut