Kalaallit Nunaanni kulturimullu tunngasuni ataqqinnittumik suleqatigiinnissamut tunngavissat
NAPA eqqumiitsuliortut, kulturikkut suliaqartut kattuffiillu Kalaallit Nunaata eqqumiitsuliornermut kulturimullu tunngasuni ataqqinnittumik suleqatigiinnissamut tunngavissanik nutaanik ineriartortitsinermi peqataaqqullugit qaaqquai.
Kalaallit Nunaat pillugu soqutiginninneq annertusiartorpoq. Nunani avannarlerni nunanilu tamalaani eqqumiitsuliortut, kulturikkut ingerlatsiviit, filmiliortut, festivalinik aaqqissuisut ilisimatusartullu amerliartuinnartut Kalaallit Nunaanni suleqateqarnissamik kissaateqarput. Tamanna paarlaasseqatigiinnissamut suleqatigiinnissamullu nutaanut periarfissiivoq – kisianni aamma suleqatigiinnerit qanoq pilersinneqartarnissaannut ingerlanneqartarnissaannullu piumasaqaatinik pilersitsilluni.
Taamaattumik NAPA – Nunani Avannarlerni Piorsarsimassutsikkut Attaveqaat Kalaallit Nunaanni – Kalaallit Nunaata eqqumiitsuliornermut kulturimullu tunngasuni ataqqinnittumik suleqatigiinnissamut tunngavissanik ineriartortitsinermik ataqatigiissaarivoq. Siunertaavoq sakkussamik atorneqarsinnaasumik pilersitsinissaq, avataaneersunik suleqateqarnermi ataqqinninneq, naligiissitaaneq, sumiiffimmi tunngaveqarneq paaseqatigiinnerlu tunngavigalugit suleqatigiinnernik ikorfartuisussamik.
Tunngaviit ilaatigut makkununnga iluaqutaassapput:
- najukkamiittut avataaneersullu akornanni naligiissumik suleqatigiinnernik nukittorsaaneq
- kalaallit nipaat isiginnittaasiilu tusarneqarnissaasa qulakkeerneqarnissaat
- paatsoornerit eqqunngitsumillu saqqummiinerit pinaveersaartinneqarnissaat
- kulturikkut kinaassutsip namminersorlunilu aalajangiisinnaanerup tapersersorneqarnissaat
- nunat kulturiillu assigiinngitsut akornanni piujuartitsisumik suleqatigiinnissamut pitsaanerusunik sinaakkutissiineq
Nuummi Sisimiunilu workshopit
Suliniutip pingaaruteqartup ilaattut NAPA eqqumiitsuliortut, kulturikkut suliaqartut, suliffeqarfiit kattuffiillu workshopinut peqataaqqullugit qaaqqusivoq. Workshopini tunngaviit Kalaallit Nunaanni kulturikkut ingerlatsisut peqatigalugit ineriartortinneqassapput.
Nuuk Oktober 8., 2026 nal. 09.00–16.00, Katuaq
imaluunniit,
Sisimiut Oktober 10., 2026 nal. 09.00–16.00, Taseralik
Peqataasut misilittakkaminnik, isiginnittaatsiminnik siunnersuutiminnillu avitseqataassapput, Kalaallit Nunaanni eqqumiitsuliornermut kulturimullu tunngasut kiisalu avataaneersunik suleqatit akornanni pitsaasumik ataqqinnittumillu qanoq suleqatigiittoqarsinnaanersoq pillugu.
Workshopini aamma Saamit Siunnersuisoqatigiiffianit peqataasut najuutissapput, Sápmimi assingusunik apeqqutini sulinerminnit misilittakkaminnik avitseqatigiissallutik. Peqataanerat nunat inoqqaavisa akornanni suleqatigiinnermut, sinniisuunermut kulturikkullu namminersornermut tunngatillugu ilisimasanik misilittakkanillu paarlaasseqatigiinnissamut periarfissiissaaq.
“Suleqatigiikkusuppugut, kisianni nammineq piumasaqaatitsinnik tunngaveqarluta. Pingaaruteqarpoq avataaneersut kulturerput ataqqissagaat, aammalu uagut pisussaaffigaarput kalaallit/inuit kulturii qanoq ittuunersut takutinnissaat. Taamaaliornikkut siunissami Kalaallit Nunaanni kulturiit assigiinngitsut akornanni suleqatigiinneq ajornannginnerulissaaq.”
– AneMarie Ottosen, suliniummi ataqatigiissaarisoq
Nalunaarneq
Ullup ingerlanerani ulloqeqqasiorneq kiisalu kaffi tiilu sassaalliutigineqassapput. Peqataanermut qujassutitut peqataasut tamarmik 2.000 DKK-inik akissarsisinneqassapput.
Nalunaarnissamut killiliussaq: 1. september 2026 imaluunniit inissat tamakkerlutik inuttaqalernissaasa tungaanut.
Nalunaarfik:
https://forms.gle/SjVsuVNjACk9eyyF7
Suliniutip tunuliaqutaa
Suliniut nunat inoqqaavisa allat kulturikkullu avatangiisiisa avataaneersunik suleqateqarnermi namminneq malittarisassianik tunngavissanillu ineriartortitsisimanerannik misilittakkanik tunngaveqarpoq. Peqatigisaanik suliniut Kalaallit Nunaanni pissutsinik aallaaveqarpoq, tassani oqaatsit, oqaluttuarisaanikkut tunuliaqutaq, kulturi najukkamilu isiginnittaatsit siunissami suleqatigiinnerni tunngavigineqassallutik.
Paasititsiniaalluni ataatsimiinnerit, nunani tamalaani misilittakkanik paarlaasseqatigiinnerit kiisalu Kalaallit Nunaanni kulturikkut ingerlatsisut peqatigalugit workshopit aqqutigalugit suliniut tunngavissanik ineriartortitsissaaq, taakku avataaneersunik suleqateqarnermi atorneqarsinnaassallutik.
Apeqqutissaqaruit NAPA attavigisinnaavat uunga: naja@napa.gl.
Nutaarsiassat takunngitsoorpigit?
Kalaallit Nunaannit Alaskamut: Inuusuttut AWG-mut takutitsisussat piareersarput
Isiginnaartitsisussat inuusuttut piginnaasaqarluartut Poul Erik Kristiansen, Hans Lili Karlsen, Qarsoq Rasmussen, Petra Bidstrup, Aviaaja Korneliussen aamma Louisa Ignatiussen Alaskami Mat-sumi Arctic Winter Games 2024-mut kultoorikkut takutitsinissamut piareersaleruttorput. Sisamanngornermat inuusuttut isiginnaartitsisartut Arctic Winter Gamesimut atisassatik, ilaatigut annoraat aappalaartut Meqqusaalimit ilusilersorneqartut, tiguvaat. Sapaatip akunnera una Team Kalaallit
Kalaallit Nunaat-Nunat Avannarliit pillugu isumaqatigiissutip ukiunik 40-nngortorsiornera nalliuttorsiutigineqarpoq
Ullumikkut ukiut 40-t qaangiupput Namminersornerullutik Oqartussat aamma Nunani Avannarlerni Ministerit Siunnersuisoqatigiivisa isumaqatigiissutigimmassuk nunatsinni Kalaallit Nunaat-Nunat Avannarliit pillugu allaffimmik pilersitsisoqassasoq. 1985-imi 11. december taamanikkut Nunani Avannarlerni Ministerit Siunnersuisoqatigiivini siulittaasuusimasoq Bertel Haarder aamma Kulturimut, Ilageeqarnermut Ilinniartitaanermullu Naalakkersuisuusimasoq Stephen Heilmann NAPA-mik pilersitsinissamik isumaqatigiissummik atsiorput. Isumaqatigiissut 1986-imi januaarip aallaqqaataani
Nunat Avannarliit Issittumut Tapiisarfiat pillugu webinari
(Malugiuk: Webinari tuluttut ingerlanneqarpoq.) Nunat Avannarliit Issittumi suliniutaat (NAP) pillugu paasisaqarnerugit – tapiisarfik nunani avannarlerni issittumilu suleqataasut suleqatigiinnerannik tapiissuteqartarpoq, inuiaqatigiit nukittorsarneqarnissaat, piujuartitsisumik mingutsinngitsumillu ineriartortitsinissaq Issittumilu inuiaqatigiinnik nukittuunik uummaarissunillu siunertaralugu. Webinaarimi minutsini 35-ni sivisussuseqartumi matumani uku sammineqarput: Qinnuteqaat sunik imaqassava Qinnuteqarnermi suut eqqaamasariaqarpigit Nalilersuineq qanoq ingerlanneqartarpa
Inuusuttut arfinillit Arctic Winter Games 2026-mi kulturikkut aallartitassatut toqqarneqarput
Arctic Winter Games 2026-mi kulturikkut aallartitat toqqarneqarput. Inuusuttut arfinillit uku Arctic Winter Gamesimi kulturikkut sammisassami nunarput sinnerlugu takutitsissapput: Nikku, Ayla, Simmujooq, Zoe, Uilu aamma Smilla. Oktobarip ingerlanerani toqqagaasut Nuummi katersuupput, siullermeerlutillu imminnut naapillutik ilitsersuisorlu Varna Marianne Nielsen naapillugu. Inuusuttut Varnalu 2026-mi februaarip tungaanut ataavartumik attaveqarumaarput,