Law Shifters tassaavoq eqqumiitsuliornermi suliaq meeqqanut inuusuttunullu sammisoq, eqqumiitsuliortumit Stine Marie Jacobsenimit pilersinneqarsimasoq. Law Shifters 2019-imi Nuummi Eqqumiitsulianik Saqqummersitsivimmiissimavoq. Ukiuni kingullerni arfinilinni nunani arlalinni ingerlaarsimavoq.

Law Shiftersip innuttaasut inuusuttunik inatsisit demokratilu pillugit peqataalersitsivoq. Law Shifters politikkikkut isummersornermik, ileqqorissaarnermut isummanik, naapertuilluarnermillu misigissutsinik inuusuttunut oqallissaarutaavoq. Piviusorsiortumik, qungujunnarsinnaasumik nutaalionermillu tunngaveqarlutik inatsisit piviusut Law Shifters aqqutigalugu sammineqarsinnaapput.

Piviusumik eqqartuussissagaluaruit eqqartuussinerit qanormita issagaluarpa, nunagisannilu inatsisit allanngortissagaluarukkit qanormita naapertuunnerusunngortissinnaavigit? Ilinniartitsisut atuartullu ataatsimoorlutik apeqqutit taakku atuagaq Law Shifters atorlugu paasiniaallutillu akisinnaavaat. Atuagaq atuarfinnut tulluarsagaavoq, demokrati, inatsisit pisinnaatitaaffiillu pillugit pinnguarnertaqarluni, suliassartaqarluni oqaloqatigiissutissanillu imaqarluni.

Atuagaq meeqqat atuarfiini ilinniarnertuunngorniarfinnilu atuartitsissutissanik imaqarpoq. Law Shifters aqqutigalugu atuartut isummaminnik tunngavilersuineq ilinniarlugulu sungiusarsinnaavaat. Atuagaq Kalaallit Nunaanni atuarfinnut tamanut agguaanneqarpoq. Atuakkat tamarmik kalaallisut, qallunaatut, tuluttullu allaqqapput.

Law Shifters NAPA-mit taperneqarsimavoq.

Law Shifters pillugu suli paasisaqarit

Nuummi Eqqumiitsulianik Saqqummersitsivimmi Law Shiftersikkut inatsit siunnersuutit takukkit