NAPA-p sulisui nunaqarfimmut 1. september apuummata Kullorsuaq seqinniinnaranilu silagiinnanngilaq, kisianni aamma ulapaarfiullunilu pisoqaqaaq
Inuaqerpalaartoqarpoq, Kullorsuullu aqqusernani nunaqarfimmiut qungujullutik ilassisarpaatigut.
Nunaqarfiup qeqqani angutit betonilerillutik ulappupput, tassami aqqusineq pingaarneq nutaaq suliarineqaleruttorpoq, aqqusinitoqaq upernaami aput aammat kuugussaasimammat.
Angalaqatigut innuttaasut illuat ’Prins Henrik’ ornimmassuk NAPA-p sulisuusugut Kullorsuup Atuarfissuanukarpugut.
Tassani atuarfiup pisortaa aamma Angajullerni atuartut naapinniarlugit isumaqatigiissuteqarfigisimavagut.
Naapitsinnagit suli akunneq 1 piffissaqaratta atuarfiup silataani kaffisorujoorpugut immamullu isikkivik kusanaqisoq qeqertatut angitigisutut iluliarsualik isiginnaarparput.
Kullorsuarmut apuuteqaagut, angalanitsinni angusassarput avannnarlerpaaq anguinnanngilarput, angalanittami affaa aamma ingerlareersimavoq.
Mallit iffiallu
- augustimiilli angalasimavugut, umiarsuaaraq ’Tulu’ Nuummi talittarfimmit allarpoq nal. 10:00.
Ilulissat siulliullugu ornipparput, tassanngaanniillu Uummanniarpugut kingorna Upernavimmukarluta, taakkulu kingulliit nunaqarfittai amerlanerit tikippagut. Ilulissiarnerput nalunaaquttap akunneri 40-t ataallugit sivisussuseqarpoq, ilaasullu 12-it ingerlaarneq tamaat malissiungaatsiarneq naammagittarfigisariaqarpaat, malissuit umiarsuup saneraanut qaartarput timitsinnullu malunniutingaatsiarlutik. Ilulissani niugatta suli aalasutut misigaagut, taamalu angalanitta naanissaata tungaanut misigilluta.
Umiarsuarmi igasup Ellenip ullaakkut boorluliarisartagai mamarsaatigisaqaagut, ullaallu tamaasa nunguttarmata Ellen ullut tamaasa iffiortariaqartarpoq. Ellen-bolle Nutellalerlugu aatsaat tassa, angalanermi (sulimilumi mamassalluni) mamarsaatigeqaarput.
Sinnattut killeqanngillat
Nal. 15 atuarfimmut iseratta atuartoqanngilaq. Akunnerup affaa sioqqullugu angerlarlutik neriartorlutik anisimapput. Taamaattumik naluarput ilumut takkunniarnersut, isumaqatigiippugullu nassatatta poortoqqinngerini utaqqeqqaalaarniarluta.
Qujanartumillu utaqqigatta, tassami 5 minutsit qaangiutinngitsulluunniit isaapput.
Niviarsiaqqat alapernaatsut qulingiluat klassimi iniminnut issaapput, kikkuunitsinnillu sunalu pillugu aggersimanerluta oqaluttuutereeratsigit niviarsiaqqat titartaallutik aallartipput.
(Maasi kalaallisut imminut ilisaritimmat assut tupaallapput, assullu illarrapput. Maasimi qaamasorujussuuvoq).
Niviarsiaqqat piumassusillit maanna titartaapput. Illussanik titartaasartutut, nakorsatut, ilinniartitsisusut, iffiortutut, eqqumiitsuliortutut ilinniagaqarusupput kiisalu erinarsortartunngorusuttoqarlunilu aamma inuuniutigalugu computerikkut spilertartunngorusuttoqarpoq.
Sinnattut pillugit workshoppi akunnerup 1-ip missaannik sivisussuseqarpoq, taamaattorli niviarsiaqqat suliassaminnik ukkataqarluarput, assullu tiguarteqqallutik titartaapput qalipaallutillu.
Periarfissat tigulluarneqarput
Niviarsiaqqat titartaanerannik aallartitseriarlugit Bulap nunani avannarlerni periarfissat assigiinngitsut atuarfiup pisortaanut saqqummiuppai, ingammik atuarfiup nordeniskolen.org-imi qarasaasiakkut atuartitsissutit atorneqarsinnaasut pillugit periarfissat aamma nordplus aqqutigalugu nunani avannarlerni atuartut ikinngutitaarnissaanut periarfissaat oqaluttarai.
Atuarfiit pisortaat ilinniartitsisullu NAPA-p uani angalanermini naapissimasai tamarmik periarfissarpassuarnut oqaluttuarineqartunut assut soqutiginnissimapput, soorlu aamma Kullorsuarmi taamaattoq.
Internetimut attaveqaatitigut ajornartorsiuteqaraluarlutik aamma ilaatigut IT-kkut atortutigut suli aallartivissorsimanngikkaluarlutik nordeniskolenimi atuarfiit qarasaasiakkut atuartitsissutit atorsinnaasat annertuut tusarlugit assut nuannaarutigaat, 1.-10. klassinut aamma ilinniarnertuunngorniarfinnut allaat atuartitsissutitalllit.
Atuarfiup pisortaanik oqaloqatigiinneq arriitsumik atuartitsissutiinnarnut tunnganngitsunut saakkiartortoq niviarsiaqqat suli seqinninnernerani iniminnit aniniarlutik aamma tuaviutsapput.
Poortueriarluta qujavugut nal. 16-illu kinguninngua anilluta.
”Puisimik nassarusuppisi?”
Nunaqarfimmit ‘TULU’-mukaqqinngitsinni akunnerup affaa suli piffissaqarpugut, uagullu NAPA-mi sulisuusugut nunaqarfiup killingani talittarfimmut pisuttuarpugut, taakanigooq isivikkivik kusanarluinnartuummmat.
Tassalumi.
Seqineq qaffasippoq anorilu malunnarpiarani, assorsuarlu kusanarpoq alianaallunilu, tussunngunangaarmallu nipaqarata issiarusaarpugut, imaq 5 meterinik qulaaqqallugu, eqqissisimaneq malugeqqissaarlugu.
Sequnngerluta kiinnagut seqinermut saatsippagut taamalu issiarusaarpugut.
Naggataagut perlilikumisaarluta misigilerpugtu, puisilu eqqarsaatigileriaratsigu puisitorusulluta takorluuilluta eqqartuilerpugut (Kullorsuarmimi piniartut puisinik pilattut takusaqattaarpagut.
”Qanorli Ellen unnugu puisiliortillugu”
Ingerlaqqileratta atitsinnit sissamit suaarneqarpugut. Piniartoq umiatsiaaqqamink apuussimavoq, puisillu marluk pisaarlaat kalippai. Aamma atinnguatsinni puisit marluk ameerneqarsimasut immamiipput.
”Oqaluunnersiuna tusaagakku, puisiminermik perusunnersusi aperiniarissi?” aperaatigut. Neqeroorutaanullu qujaannartariaqarpugut, qerititsiveqannginnatta.
Aallangajaleratta sissiukkap aappaata tungaanukarpugut, ‘TULU’-mi tassunga ungasigani kisarsimavoq.
Kullorsuarmi ulloq nuanneqqissaartoq atorsimavarput, maannalu angalanitta affaa kingulleq angalasussanngoratsigu inuit Kullorsuarmiut qungujullutik nuannaarlutillu ilassioraartut naapillugit assut nuannerpoq.
Taavalu tassa kujammut aallaqqippugut.
Nutaarsiassat takunngitsoorpigit?
NAPAmi suliniutinut ataqatigiissaarisussaq sullarissoq
Maannguaq Rosing NAPAmi suliniutinut ataqatigiissaarisunngorpoq. Taanna Formel-1-imi sukkaniuttartutut sukkatigaluni aallartilluareerpoq. Ataasinngornermi aggustip 15-iani Maannguaq Rosing nuannaarluni NAPAmut iserpoq. Suliniutinut ataqatigiissaarisussatummi ulloq taanna Maannguaq sulileqqaarpoq. Maannguaq kajumissuseqarluarluni suliassaq siulleq aallartippaa. Suliassarli imaannaanngitsuuvoq. Taassumami allagarpassuit digitalinngortittussaammagit. Ullulli pingasuinnaat qaangiutereersut pappilissat tuusintilikkaat skannereerlugit suliaq naammassivaa. Maannguaq eqqissisimasuuvoq sukkasuumillu
Kalaallit Nordjobbimut qinnuteqarsimasut marloriaatinngorput
NAPA-mit paasisitsiniaaneq sukumiisoq kinguneqarpoq Nordjobb tassaavoq inuusuttunut nunani avannarlerni najugalinnut Nunani Avannarlerni nunamut allamut aasaanerani ukiulluunniit ilaani suliartorsinnaanermut periarfissaq. Kalaallit Nunaannut inuusuttut suliartorlutik tikittartut ukiumut 80-90-it missaanniittarput. Kalaallit nunanut allanut suliartortartut taama amerlatiginngillat. Kalaallimmi qinnuteqartartut aggguaqatigiissillugu ukiumut 5-6-iusarput. NAPA ukioq manna angalatitaqarsimavoq, Nordisk Ministerrådip ataani
Pisimasunik oqaluttuarneq (Storytelling)
Nunani Avannarlerni Pinngortitaq pillugu Oqaluttuat (Nordiske Naturfortællinger – Nordic Nature Narratives) Nunani Avannarlerni kinguaariit kulturillu akornanni inuit namminneq oqaluttuaannik pinngortitarlu pillugu isiginneriaasiannik sammisaqarpoq. Kalaallit Nunaanni, Norgep Avannaani Danmarkimilu 2021-miit 2022-mut ingerlanneqassaaq. Pinngortitap inuunitsinnut sunniutai aamma piujuartitsilluni ineriartuineq ilinniarfigineqarneranni suliniut aqqutigalugu Naalagaaffiit Peqatigiit nunarsuaq tamakkerlugu anguniagassatut
Issittumi Suleqatigiinnermut Tapiissuteqartarfik pillugu webinari siulleq ingerlanneqarsimalerpoq
Nunani Avannarlerni Piorsarsimassutsikkut Attaveqaat / NAPA-p aamma Ilisimatusarfiup Issittumi Suleqatigiinnermut Tapiissuteqartarfik pillugu paasissutissiilluni ataatsimiinneq siulleq webinaritut ingerlappaat ulloq 18. januar 2022. Paasissutissiinermut peqataasut 70-it missaanniipput, ilaatigullu ukunanngaanneersuullutik Kalaallit Nunaat, Danmark, Norge, Finland aamma Island. Webinarimi tapiissuteqartarfik pillugu paasissutissiisoqarpoq, aamma peqataasut suliniutit pillugit apeqquteqarlutik. Apeqqutit NAPA-mit