NAPA nunani avannarlerni periarfissat Kalaallit Nunaanni ilisimaneqarnerulernissaat pillugu suliaqarpoq, taamaattumillu NAPA meeqqanut, inuusuttunut inersimasunullu paasissutissiiffiusumik workshoppertitsisalersimavoq, taannalu taaguuteqarpoq SULINIUT MII. MII “Meeqqaat Inuusuttullu ilaapput”-mit naalisagaavoq.
NAPA-p angalanermini inuusuttut inersimasullu kulturikkut suliniutinik suliaqartut naapittarpai. Aamma innuttaasut nunani avannarlerni suleqatigiinnermik soqutigisallit naapittarpagut, matumani ass. Nunat Avannarlermioqatigiit, Nordplus aamma Nordjobb.
NAPA – napa@napa.gl
Meeqqanut inuusuttunullu eqqumiitsuliortoq suleqatigalugu workshoppertitsisarpugut. Tasiilami Sisimiunilu inuusuttut sinnattutik tungujortunik qalipaaserlutik qalipappaat, taakkulu kingorna iikkamut nivinngarneqarput. Sorpassuit pillugit sinnattuupput, snescooterertaarnissamit tusaamasanngornissamut imaluunniit terminalarbejderisut ilinniagaqarnissamik sinnattuullutik.
Nunatsinnit suliniutinit meeqqanit inuusuttunillu peqataatitsisunit amerlanernik qinnuteqartoqartalernissaa kissaatigaarput.
NAPA-p inuusuttut aamma allat kulturilerisut qanoq ilillutik kulturikkut suliniutinik ineriartortitsisinnaanersut, aamma qanoq NAPA-p kulturimut tapiisarfianut qinnuteqarsinnaanersut pillugit siunnersortarpai. Aamma nunani avannarlerni qinnuteqartarfiit pillugit, ass. Nordisk Kulturkontakt tusagaqarfigisarpaat.
NAPA angalatinnani sumiiffinni inuusuttut illui, kulturikkut illorsuit, atuarfiit, nipilersornermik atuarfiit aamma kulturilerisut nunani avannarlerni periarfissat aamma meeqqanut inuusuttunullu workshoppit naleqqussakkat pillugit aaqqissuunissaat suleqatiseralugit attavigisarpai. NAPA-p Tasiilami inuusuttut illuat Igdlo, Sisimiunilu Kulturip illorsua Taseralik suleqatigisimavai. Aamma NAPA-p sumiiffinni perorsaanikkut sulisut, eqqumiitsuliortut kulturilerisullu nunatsinni attaveqaatini amerlisarusullugit ataatsimeeqatigisarpai.
Innuttaasut nutaanik pilersitsinikkut aamma kulturikkut suliniutinik ineriartuinissaminnut peqataanissamut periarfissarpassuaqarput, aamma NAPA-p kulturimut tapiisarfianut qinnuteqaqqullugit kaammattorpagut.
Norden i Skolen, Reykjavikimi Nunat Avannarlermiut Illuat kiisalu Savalimmiuni Nunat Avannarliit Illuat suleqatigalugit suliniutigaarput “Vi er Vestnorden” / Nunat Avannarliit Killermiuuvugut. Tassani 7.-10. klassinut atuartitsissutitigut suleqatigiissuterput qulequtaqarpoq: Kinaassutsitsinnut oqaatsit qanoq pingaaruteqartigippat.
