Nunatsinniit nutaaliorlutik aallarniisut nunarsuaq tamakkerlugu aaqqisuukkami peqataasut

Kalaallit Nunaat kulturilerinermut nutaaliornermut tunngasuni pikkorissut amerlapput. Taakkulu nutaaliortartuni ilaat aallarniisuupput inuussutigalugulu. Nunani allani niueqateqarnissaq attaveqaqateqarnissarlu ineriartornissamut iluaqutigisinnaavaat. Taamaammat NAPA-p Bolt Lamar Creative Business Cupimut peqataanissaannut qaaqquai; tassaasorlu nunat assigiinngitsut akornanni nutaarliornermik aallarniisut pillugit aaqqissugaq. Angunnguaq Larsen nunat 50-t akornanni ajugaaniuunnermut naliliisutut qaaqquneqarluni peqataatinneqarpoq.

Arny Mogensen aamma Mala Johnsen atisaarniarfik Bolt Lamar ingerlappaat, taannalu atisaarniarfik ineriartorluarsimavoq, maannalu nunanut allanut ammaannerulernissaanut piareerlutik. ”Atisaarniarfipput qanoq ineriartorsinnaanerannut ammasorujussuuvugut, tamaammat Creative Business Cupimut peqataanissatsinnut angerpugut. Nunat assigiinngitsut akornanni attaveqaqatigiinnermut tungaatigut pissarsiaqaqaagut. Aamma niueqatigisinnaasamik nutaamik nassaarpugut. Tassaavorlu Libanonimeersut aallarniisut, alersinik sanasartut, taakkulu uagutsinnut pisariaqartitatsinnut tungaatigut naleqqulluarlutik”, Arny aamma Mala oqarput.

Angunnguaq Larsen qanoq nunatsinni kulturilerinermi aallarniisarneq atugaqarneq pillugu nunat assigiinngitsuni aallarniisorpassuarnut saqqummiivoq. Aaqqissuussaanermi oqaluttuarisaanermilu kulturikkut sinaakkutsit Kalaallit Nunaani allaanerungaarnerat pillugu ilaatigut tikkuarpaa, taamaattumik kulturilernimi aallarniisuuniaraanni inuit ataqatigiinnerat eqqarsaatigisariaqartarparput. Kalaallit Nunatsinni nunani allani nutaaliornerup tungaatigut assigiissutigut siullermik tassaapput takorluuisinnaanerput aappaattullu nunat assigiinngitsut akornanni atassuteqalernissamut pisariaqartitsineq.

”Aaqqissuukkami peqataasut amerlasuut Kalaallit Nunaat naluaat, saqqummeereerlungali nunatsinnut soqutiginninnerulernissaat suleqatigiikkusunnerulernissaallu ilimasuutigaara. Takornariatuunngitsoq kisianni suleqatigiinnissamut.” Angunnguaq Larsen oqarpoq.

Nunani Avannarlerni tamani Issittormiut inuunermut paasinnittariaasiat takuneqarnissaa NAPAp sulissutigaa, aammalu Nunani Avannarlerni tamani inuiaqatigiinni piujuaannartitsinissamut sulissutigaa. Taamaammat nunatsinni kulturilerisut aallarniisuullu nunani assigiinngitsuni siuarsanissaq NAPAmi pissusissamisoorpoq. ”Nunatsinni nutaaliortartut nammineq paasinnittariaasiat nunat assigiinngitsut akornannut saqqummernissaat aamma pingaaruteqarpoq. Kalaallit Nunaat allanut tunniussaqarluarsinnaavoq, tamannalu takutittariaqarparput”, NAPA-mi pisortaq Søren Würtz oqarpoq nangillunilu: ”Namminersortut nutaaliornermik suliaqartut amerlanerusut inuussutiginiarnissaat anguniagaraara. Kulturikkut aningaasaqarnikkullu piujuaannartitsineq atatigiissapput.”