Nunatsinni agiartartut Nunat Avannarlermiut
Nunanit Avannarlernit agiartartut, Unison Strings nunatsinni workshoppertitsillutillu tusarnaartitsisarsimapput – NAPAp kulturimut tapiisarfianit taperneqarlutik.
2014-imiilli agiarnermik festivalip Unison Strings Festival – Greenland, ukiut tamaasa nunanit avannarlermiunit nipilersortartut kalaallit, savalimmiormiut, islandimiut qallunaallu agiarnermik ilinniartut aamma inuuniutigalugu agiartartut ulluni 10-ni Kalaallit Nunaanni sungiusarnertalimmut tusarnaartitsinertalimmullu festivalimut qaaqqusarpai. 2018-imi festivali allaanerusumik ingerlavoq, kalaallit rockimik nipilersortartut Small Time Giantsikkut Unison Strings Festivalip klassiskimik agiartartuilu ataatsimoorlutik Ilulissani nuannivissumik tusarnaartitsimmata. Tusarnaartitsineq assut nuannersimavoq iluliarmiullu 600-t pallillugit tusarnaariarsimapput. Tusarnaartitsineq Jens Christian Lennert Lyberthimit Anda Otto Schmidtimillu filmiliarineqarsimavoq, filmimilu takuneqarsinnaavoq nunat akornanni nipilersortartut ukiumikkut kulturimikkullu assigiinngikkaluarlutik nuannerluinnartunik pilersitsisinnaasut.
Suliniut NAPA-mit tapiiffigineqarsimavoq.