Inuusuttut atuakkiortunngortussamaatit oqaluttualiatik ersinartulikkersaarutiliatik Nuummi allannermut bootcampini aaqqissorpaat
Inuusuttut allannermik piginnaasallit Allatta!-mut peqataasimapput. Peqataasullu Paninnguaq Boassen aamma Sørine Steenholdt peqatigalugit ersinartulikkersaarutitik pitsaanerulersillugit suliarisimavaat.
Atuakkialerineq aamma allannissamut kajumissuseq kalaallit oqaasiisa ineriartortinnissaannut pingaaruteqarput, aamma nunat tamalaani atuakkiortunut naleqqiunneqarsinnaasunik amerlanerusunik atuakkiortoqalissagutta piginnaasanik ineriartortitsineq pingaaruteqarpoq. Taamaattumik Nunani Avannarlerni Piorsarsimassutsikkut Attaveqaat (NAPA) aamma Kalaallit Atuakkiortut piginnaasanut suliniuteqarfik Allatta! suleqatigiissutigiissutigaat!
Oqaluttualianik unammisitsineq Allatta! maanna sisamassaanik ingerlanneqarpoq. Allatta! Kalaallit Nunaanni inuusuttut atuakkialerinermik soqutigisallit siuarsaaviginissaannut pingaarutilimmik isaaffiuvoq. Siusinnerusukkut peqataasut assut iluatsilluartumik angusaqarsimapput, soorlu atuakkiortoq Niviaq Korneliussen unammisitsinermit tassannga aallaaveqarluni atuakkiortunngorsimasoq. Massakkut Allatta!-p sammisaq “oqaluttualiat ersinartulikkersaarutit” sammivai, atuakkiortullu inuusuttut nalunartut pissanganartullu sammillugit allassimapput.
Allatta!-p assut iluatsilluartumik ullut sisamat ingerlanerini inuusuttut piginnaanillit arfinillit allannermut bootcampertissimavai. Bootcampip Paninnguaq Boassenimit aamma Sørine Steenholdtimit peqataaffigineqartup inuusuttut piginnaanillit taakku arfinillit sakkussaqalersissimavai aamma oqaluttualiaat pillugit isummerfigisimallugit taamaalillutik oqaluttualiatik pitsaanerulersissinnaassammatigit allannermillu nuannarisaqarnertik sammisinnaallugu.
Maannakkorpiaq inuusuttut atuakkiortunngortussamaatit oqaluttualiatik naammassillugit allappaat, atuartartullu tarnip pissusiitigut pissanganartulersaarutinit takorluuilluni oqaluttualiat saqqummernissaat naatsorsuutigisinnaavaat. Ukiup naalernerani saqqummersitsisoqarnissaa naatsorsuutigineqarpoq. Paninnguaq Boassenip inuusuttut kakkagisorujussuuai:
– Pissanganartumik ilinniarfiusumillu bootcamperpugut, tassani Sørine Steenholdtip uangalu peqataasut oqaluttualiaasa aaqqissuunnissaannut aamma siunissami atuakkiortunngornissamut pilersaarutigisinnaasaat pillugit ilitsersorpagut. Bootcampi ingerlalluarpoq sineriammiillu assigiinngitsuneersut peqataapput, oqarpoq Paninnguaq Boassen nangillunilu:
– Inuusuttut inuunerminnit misilittakkaminnik aamma siunissami atuakkiortunngornissamut periarfissaqarnertik avitseqatigiissutigisimavaat. Oqaluttualiat assut suliarineqarsimapput, angusallu saqqummiunnissaat assut qilanaaraarput.
Manna qilanaarisinnaavat
Allatta!-mut peqataasut arfinillit Kalaallit Nunaanni nunap immikkoortuinit assigiinngitsuneersuupput, tamarmillu immikkut isiginnittariaaseqarlutillu allariaaseqarput.
Gertrud-Marie “Kiitu” Kreutzmann
Taakku ilagaat Gertrud-Marie “Kiitu” Kreutzmann, 24-nik ukiulik Ilisimatusarfimmi ilinniartoq, taanna Allatta! aqqutigalugu saqqummersitseqqaassaaq. Kiitup tarnip pissusiitigut pissanganartuliami inuup annilaanganermik malersorneqarnermillu misigisaqartup unammilligai sammivai. Kiitup bootcampi oqaluttualiami oqiliallaataasumik avatangiiseqarluni oqallisiginissaanut aamma isummerfigitinnermik pingaarutilimmik pissarsiaqarfigisimallugu oqaluttuaraa.
– Soorlu tusaaneqarluni. Bootcampimi taama pikkoritsigisunik allanik ilaqarluni misigisaq assut nuannerpoq. Allat allatannut isummertarput aamma oqaluttualiaq qanoq ersinarninngortissinnaagiga siunnersuuteqartarlutik. Bootcampip ulluani siullermili assut amerlasuunik nutaanik isumassarsereerpunga, oqarpoq Kiitu Kreutzmann.
Nialiannguaq Simigaq
Nialiannguaq Simigaq, Qaanaameersoq maannalu Nuummi Niuernermik Ilinniarfimmi ilinniartuusoq, atisaarniarfimmi inuusat marluk akileriittut pillugit misigisat ersinartut sammivai.
– Bootcampi assut pissarsiaqarfigisimavara. Aamma naatsorsuutigisannit nuannernerujussuusimavoq, Nialiannguaq Simigaq oqaluttuarpoq.
Pilunnguaq Karlsen Kristensen
Pilunnguaq Karlsen Kristensen Kullorsuarmi inunngorlunilu peroriartorsimavoq, maannali Avannaani nunaqarfimmi Innaarsummi najugaqarluni, Nuummullu sivisuumik timmisartorsimavoq bootcampimut peqataajartorluni. 22-nik ukioqarpoq aamma tarnikkut eqqarsartaatsimi ajornartorsiutit peroriartornermi qulaajaaffigineqarneq ajortut pillugit oqaluttualiorluni. Ajornartorsiutit inummi pingaarnerusumi takorluuinertut ajorsigaluttuinnarput.
– Mikigallaramali allannissara assut nuannarisimavara. Peroriartorninni eqqarsaatigillattaasarsimavara allatama ilaasa saqqummersinnissaannut periarfissaqalissagaluaruma periarfissaq atorumaarlugu. Uanga inuttut ineriartorneq pillugu allaaserisaqarnissara nuannaraara. Taamaattumik aamma oqaluttualiara Allatta!-mut nassiussimavara, oqarpoq Pilunnguaq Karlsen Kristensen nangillunilu:
– Bootcampimi atuakkiortuuneq pillugu assut ilinniagaqarsimavunga. Assersuutigalugu atuakkiortutut suut ilisimasaqarfigisariaqarnerigut aamma atuartut qanoq ililluta tigusarisinnaanerigut.
Nivi Mathiesen
23-nik ukiulik Nivi Mathiesen Qaqortummiit Nuummukarsimavoq ernini ilagalugu bootcampimut peqataajartorluni. Nivi Aappilattumi inunngorlunilu peroriartorsimavoq, maannali Qaqortumi najugaqarpoq Campus Kujallermilu ilinniarnertuunngorniarluni. Ilinniarnertuunngorniarfimmi ilinniartitsisuata Nivi ilinniaqataalu allat Allatta!-mut oqaluttualiatik nassiutissagaat kajumissaarsimavai.
– Bootcampimi assut ilinniagaqarsimavunga, assersuutigalugu oqaluttualiaq qanoq isikkoqarsinnaava, aamma oqaluttualiaq qulaanit isigalugu qanoq innersoq. Naak ernerma ilaginera sakkortulaaraluarsimasoq, ingerlalluarsimavoq, oqarpoq Nivi Mathiesen.
Pipaluk Nathansen
Nivip ilinniaqataa, 17-inik ukiulik Pipaluk Kielsen Nathansen aamma bootcampimut ilaavoq. Pipaluk Nuummi inunngorsimavoq Qaqortumili ilinniarnertuunngorniarluni. Taassuma niviarsiaraq illumi eqqumiitsunik misigisaqartartoq, kingornalu illup naqqani iliveqartoq pillugu paasisaqartoq allaaserivaa.
– Bootcampereerlunga misigivunga allannermut piginnaasakka pitsaanerulersimasut. Sakkussarpassuaqalersimavugut, oqaluttualiatsinnut atorsinnaasatsinnik, oqarpoq Pipaluk Kielsen Nathansen.
Ea Hoffmeyer
Ea Hoffmeyer 16-inik ukiulik aamma Qaqortumi ilinniarnertuunngorniarfimmeerpoq. Inuk peqqissimisoq pillugu allaaserisaqarpoq.
– Bootcampimut peqataalluni assut nuannersimavoq aamma ilinniarfiulluni. Allat uattulli allannermik soqutigisallit ilagalugit assut nuannersimavoq. Oqaluttualiat allatallu allat misissussallugit nuannaraara, maannalu sakkussaqarnerulersimavunga, Ea Hoffmeyer oqarpoq.
Oqaluttualianik katersukkanik atuakkiaq juullilerpat saqqummersinneqassaaq
Peqataasut arfinillit oqaluttualianik saqqummersitseqqaarnerat oqaluttualianik katersukkanik atuaganngussaaq, taaannalu pilersaarutigineqarpoq ukioq manna decemberimi saqqummissasoq. Oqaluttualianik katersukkanik atuakkiaq aamma assiliartaqassaaq, inuusuttup eqqumiitsuliortup Nicholas Rosing Petersenip sanaavinik.
Allannermik suliniut NAPA-p aamma Kalaallit Atuakkiortut pigaat.
Suleqatit allat: Arctic Media / Sørine Steenholdt aamma Oqaasilerineq, Atuakkialerineq Tusagassiuutilerinermullu immikkoortortaq, Ilisimatusarfik.
NAPA-mi suliniummut ataqatigiissaarisoq Allatta! 4.o-mullu suliniummik aqutsisoq Maannguaq Rosing attavigineqarsinnaavoq: maannguaq@napa.gl imaluunniit 53 33 30.
Nutaarsiassat takunngitsoorpigit?
Qaanaamit Qaqortumut saqqummersitsineq: Atuakkiornermi inuusuttut nipaat oqaluttualiani ataatsimoortuni saqqummersinneqarput
Arfininngorpat Kalaallit Nunaanni atuakkialerinermi pisoq malugisarialimmik pisoqassaaq, NAPA-p suleqatit allat peqatigalugit, oqaluttualiat ataatsimoortut asseqanngilluinnartut iliuusissami Allatta! inuusuttunit piukkunnaatilinnit arfinilinnit allanneqarsimasut avammut saqqummersissammagit. Qaammatit arlallit tunniusimalluarlutik allareersut inuusuttut piginnaasaqarluartut qaqutigoortut nunatsinni atuakkialerinermut tunniussassaat ilanngullugit nuannaaqaluta ilisaritissavagut. Oqaluttualiat katersat taakku pinngorartitsinermut piginnaasaqarnerisa, oqaluttuallaqqinnerisa aamma pikkorinnerisa inerneraat, uagullu
The Lost Norsemen
The Lost Norsemen: Qallunaatsiaat naapikkit – nunatsinni vikingit. Kalaallit Nunaata pinngortitaani kusanaqisumi vikingit tumaat illukuilu misigisassarsiorfigikkit. Norse Theme Parksip Trida Mediallu suleqatigiillutik saqqummersitsinerminni nunatsinni pinngortitami angalaartissavaatsit, tassani vikingit qanoq najugaqarsimanersut inuusimanersullu misigisaqarfigisinnaavatit, saqqummersitsinermilu oqaluttuat piviusullu akulerunneqassapput. Itsaq ullumikkullu piffissaq ataatsikkut misigisaqarfigikkit. Nunami ingerlaarnermi naleqqat ukiunik tuusintilikkaanik
NAPA-p allaffia aasaanerani
NAPA-p allaffia aasaanerani NAPA-p allaffia aasaanerani 28. juni – 9. julimi matoqqavoq, piffissami tassani napa@napa.gl-imut mailertoqarsinnaavoq akineqarumaarpullu. 12. juli – 2. august NAPA aasaanerani sulinngiffeqarnermi matoqassaaq. NAPA-p aasarsiorluarnissassinik kissaappaasi. D Share on facebook Share on linkedin f
Creative Business Academy International Weekend taamaatiinnarneqarpoq
Ajuusaarutigalugu nalunaarutigerusupparput NAPA-p Creative Business Academy – International Mentor Weekend, nunanit tamalaanit peqataaffigineqartussaasimagaluartup apriilip naanerani pisussatut pilersaarutaagaluartoq taamaatitsiinnartariaqaratsigu. Taamaattoqalerneranut pissutaasoq tassaavoq pilersaarutaanngitsumik aaqqissuussamut aningaasartuutit annertuallaalerneri. Taamatut nalunaartariaqarnerput ajuusaarutigaarput, sapinngisarpulli tamaat iliuuseqaraluarluta allatut aaqqiissutissarsisinnaanngilagut. Aaqqissuussamut tapersersuinersi soqutiginninnersilu qujamasuutigaavut, ajuusaarpugullu maannakkut ilimagisasitut iliorsinnaannginnatta. Ingerlateqqiguk Nutaarsiassat takunngitsoorpigit?