ALLATTA! Inersimasunut: PIFFISSALIUSSAQ KINGULLEQ NOVEMBARIP 30-AT
Inersimasunut allannermik unammisitsineq, Allatta! Inersimasunut, siullermik ingerlanneqartumut peqataarusuttut kingusinnerpaamik novembarip 30-anni nassiussisussanngorput. Ajugaasup eqqugassai: 59.000 kr.
Ajugaaniunnermut peqataarusuttut pikkorissaasuat, Sørine Steenholdt, septembarip 28-anni naggammik pikkorissaalluni workshoppertitsissaaq. Workshoppertitsineq ingerlanneqassaaq toqqaannartumik ALLATTA! Inersimasunut facebookiata qupperneratigut.
NAPA, Nunani Avannarlerni Piorsarsimassutsikkut Attaveqaatip, Kalaallit Atuakkiortut, atuakkanillu saqqummertitsisarfik Arctic Media peqatigalugit allannermik unammisitsineq, Allatta! Inersimasunut, siulleq ingerlappaat.
Unammisitsinermi atuakkiornermik soqutigisallit minnerpaamik 26-nik ukiullit peqataasinnaapput. Kalaallisut, qallunaatut tuluttulluunniit allataq unammissutigineqarsinnaavoq.
Kalaallit Nunaanni oqaluttuariaasitoqaq ileqqoq assut patajaatsuuvoq, Allatta!-lu aqqutigalugu oqaluttualiat allatat qanoq ikkaluartulluunniit nassiunneqarsinnaapput.
Sørine Steenholdt: “Nunarsuup sinnerani inuiassuit ukiut tuusintillit arlaqartut allattariaaseqareerput, nunatsinni ukiut hunnorujut missaannaat qaangiupput kinguaariinniit kinguaariinnut oqaluttuanik ingerlatitseqqiisarnerput allannermut nuukkiartorlugu aallartikkatsiguli. Taamaammat allanneq suli pikkoriffigineqarneruleraluttuinnartup saniatigut oqaluttuariaasitoqarput allannikkut oqaluttualioriaasitsinniittup ilisarinerulernissaa naqissusigassaavoq,” aaqqissueqataasoq allannermullu unammisitsinermi pikkorissaasoq nangilluni oqarpoq: “taamaattoq naqissuserusupparputtaaq allanneq pikkoriffigerujussuartutut misiginngikkaluaraanniluunniit suli peqataasoqarsinnaammat, tamattami oqaluttuassaateqarpugut.”
Inuit oqaluttuassallit allakkumassuseqartullu oqaluttualiornermik unammisitsinermut peqataanissaminnut kajumissaarneqarput. Inuusuttut 26-leereersut, inersimasut, utoqqasaat utoqqaalluunniit unammisitsinermi peqataarusuttut kingusinnerpaamik novembarip 30-anni allassimasaminnik nassiussisinnaapput.
Ukioq kingulleq Nunat Avannarlerni Ministerit Siunnersuisoqatigiivisa atuakkiortunut meeqqanut inuusuttunullu atuakkianut nersornaasiuttagaannut innersuunneqartoq Sørine Steenholdt, inersimasunut allannermik pingasoriarluni workshoppertitsereerluni, naggammik workshoppertitsissaaq Septembarip 28-anni, nal. 19:30. Allannermut workshoppit tamarmik digitalimik ingerlapput, taamaalilluni sumiinneq apeqqutaanani peqataasoqarsinnaalluni. Isigiarsuttut tusilartulluunniit peqataarusukkunik periarfissat suuneri pillugit NAPA-mut saaffiginnissinnaapput. Workshop ugguuna nanineqarsinnaavoq: Facebook
Oqaluttualiamit tigulaakkamik ikinnerpaanik qulinik annerpaamillu 20-nik quppernilimmik nassiussisoqarsinnaavoq kingusinnerpaamik novembarip 30-anni 2023, uunga: Jaqqa@napa.gl
Unammisitsinermut ajugaasup suli akileraarnani pissarsiassarai, atuakkap tunisaaneranit royalties: 59.000 kr.
“Allatta! Inersimasunut” maanna Facebookimi nassaassaalereerpoq, siunissami workshoppit, pikkorissarnerit nutaarsiassallu pillugit quppernermi malinnaavigikkit:
Facebook Allatta Inersimasunut
Allatta! Inersimasunut suliniummi aqutsisoq Jaqqa Petersen ugguuna attavigineqarsinnaavoq: Jaqqa@napa.gl
Suliamik ingerlatseqataapput: Arctic Media / Sørine Steenholdt aamma Oqaasilerinermik, Atuakkialerinermik Tusagassiuutilerinermillu immikkoortortaqarfik, Ilisimatusarfik.
Paasissutissat
- Deadline: 30. november 2023
- Peqataasinnaasut: Minnerpaamik 26-nik ukiullit
- Quppernerit minnerpaamik 10, annerpaamik 20 nassiunneqassapput
- Oqaatsit atorneqarsinnaasut: Kalaallisut, danskisut tuluttullu
- Atuakkap tunisaanerani royaltiesinit, ajugaasup suli akileraarnani akissarsiassai: 59.000 kr.
- 28. September 2023, nal. 19:30 Sørine Steenholdt Facebook Live-kkut workshoppertitsissaaq
Nutaarsiassat takunngitsoorpigit?
NAPA-p Kulturimut Tapiisarfianut Kalaallit Nunaannit tapiissutinik qinnuteqartut amerliartortut
2018-imiilli siullermeerluni NAPA-p Kulturimut Tapiissuteqarfianut qinnuteqartut nunatsinneersut Nunat Avannarlernut allanut sanilliullugit amerliartorsimapput. Tamanna ineriartorneq Kalaallit Nunaanni eqqamiitsuliornermik kulturimillu inuussutissarsiuteqartut akornanni ineriartorluartutut takussutissaavoq, NAPA-llu kulturikkut inissisimalluarnera aamma takussutissaavoq. 2023-mi NAPA, Nunani Avannarlerni Piorsarsimassutsikkut Attaveqaat Kulturimut Tapiissuteqarfianut qinnuteqaatinik katillugit 156-inik tigusaqarsimavoq. Qinnuteqartunit 156-iusunit 86-it Kalaallit Nunaanni najugaqarput,
Nunat Avannarlermioqatigiinni inuusuttunut aningaasaateqarfik
DUF – Dansk Ungdoms Fællesråd – 1940-kkunnili inuusuttut tamat oqartussaaqataanerannut ataatsimoornermullu ineriartortitsinissaanut soqutigisaqalersimavoq. Tassannga suliniut Nordens Unge i Bæredygtige Fællesskaber – NUBF – pilersinneqarsimavoq, avannarlermioqatigiit inuusuttai nutaatut ataatsimooqatigiinnermut nukittorsaanissaminnut periarfissinneqarsimallutik. NUBF-ip piujuartitsinermik tunngaveqarluni ataatsimooqatigiinnissamut kulturikkullu suniutinut peqataatitaqarnisamut Nunat Avannarliit akimorlugit suliniuteqartuuvoq inuusuttullu periarfissinniarlugit aningaasaliissuteqarsinnaasunik pilersitsisimallutik.
Kalaallit Nunaanni kulturikkut eqqumiitsuliornermillu inuussutissarsiuteqartut pisariaqartitaannik misissuineq
Nunatsinni kulturerput nukittullunilu assigiinngitsorpassuarnik tunuliaqutaqarpoq – kisiannili tamatumani sinaakkutit pisariaqartitat periarfissallu pillugit ilisimasat killeqarput. Taamaattumik NAPA 2023-mi pisariaqartitanik misissuinermik aallartitsivoq, taannalu tunngavigalugu kulturikkut eqqumiitsuliornermillu suliaqartut suliffeqarfiillu niuernikkut periarfissaat nukittorsarneqassapput. 2023-mi aamma 2024-mi NAPA apeqqutinik immersugassamik, kalaallisut, qallunaatut tuluttullu pissarsiarineqarsinnaasumik, katersuivoq. Inuit katillugit 170-it misissuinermi peqataapput.
Nunani Avannarlerni kulturilerinermi kalaallisut oqaloqatigiinnerit: Atuakkialerineq
Atuakkiortoq Niviaq Korneliussen aamma atuakkanik naqiteritsisarfimmik piginnittoq Katti Frederiksen Kalaallit Nunaanni atuakkiortut atugassarititaat pillugit oqaloqatigiipput. Oqaloqatigiinneq takuuk imaluunniit tusarnaaruk. NAPA sapaatit akunnerini aggersuni Nunani Avannarlerni kalaallisut oqaloqatigiinnerit saqqummiukkumaarpaai. Immikkoortumi uani Atuakkiortoq Niviaq Korneliussen aamma atuakkanik naqiteritsisarfimmik piginnittoq Katti Frederiksen oqaloqatigaagut. Ilisarititsineq Inuit apersorneqartut oqaloqatiginerisa oqariartuutaasalu