Tunumut, Kujataanut Avannaanullu angalanerit

Siullerpaamik paasisitsiniaalluta angalanitsinni nunatsinni illoqarfiit nunaqarfiillu 36-t tikissimavagut. 2020-mi Kujataanut angalaneq aamma 2021-mi Avannaanut angalaneq umiarsuaaqqamik alapernaarsuutaasimasumik ’TULU’-mut ilaalluta ingerlanneqarpoq, ilaasut 12-it angallammilu inuttaasut 3-t sapaatip akunneri 2-t sinnerlugit angalaqatigiittarsimallutik.

 Tasiilaq aamma Sisimiut 2020-mi kiisalu Qeqertarsuup Tunuanut 2021-mi timmisartukkut angalavugut, Qeqertarsuullu Tunuani illoqarfimmit illoqarfimmut angalanitsinni Diskolinep angallataanut ilaalluta angalasarluta.

Atuarfiit 17-it tikissimavagut taakkunanilu ilinniartitsisut 118-it attavigisimallugit. Taakku Norden i Skolen, Nordplus, Nordjobb pillugit aamma nalinginnaasumik meeqqat inuusuttullu nunani avannarlerni periarfissaat pillugit oqaluttuuttarsimallugit.  Aamma angalanitsinni atuartut 346 naapissimavagut, taaakkulu sinnattui pillugit workshoppertissimavagut  imaluunniit Uagut tassa Nunat Avannarliit Killiit pillugit workshoppertittarsimallugit.

Angalanitsinni aammattaaq ammasumik siunnersuisarfipput Tamassa ingerlattarsimavarput, tassani innuttaasut soqutiginnittut 39-t aningaasaateqarfinnut assigiingitsunut qinnuteqarnissaminnut periarfissat pillugit saqqummiisarsimalluta, aamma taakku saniatigut sumiiffinni arlalissuarni kulturilerisut 17-it naapittarsimallugit.

Kulturilerineq anguniagaavoq

NAPA-p Kalaallit Nunaanni anguniagaa tassaaavoq kalaallit nunanilu avannarlermiuni allani kulturilerisut akornanni attaveqartitsilernissaq. Taanna suliassaq pitsaanerpaamik suliarisinnaavarput Kalaallit Nunaanni inuit qanimut saaffigisinnaagutsigit.

Allaat Avannaani nunaqarfeeqqami Kangersuatsiami guitarertartoqarpoq, taannalu  nipilersornermik workshoppertitsinissaminik sinnattoqarpoq. NAPA-p ikiorsinnaagaani ilisimanngippagu, taava uagut paasitissallugu suliassaraarput. Taamaattumik siunissami illoqarfiit nunaqarfiillu sinneri 35-it tikinnissaat anguniakkatta ilagaat.

Quppernerni ataaniittuni angalanerit ataasiakkaat pillugit paasissutissat nassaarisinnaavatit tikissimasatsinnillu arlalinnit oqaluttuat atuarsinnaallugit.