Nuuk International Film Festival – maannamut qujanaq!

Nunat inoqqaavisa filmiliaat ukkatarineqartut

Nuuk International Film Festival aallarteqqaarnerminiilli Issittormiut, nunat inoqqaavi filmilinik pilersitsisartut erseqqissaaviginissaat immikkut ukkatarisimavaa.

Ukioq manna ilaatigut tamanna erserpoq immikkoortoq Fragments of Greenland aqqutigalugu, tassani kalaallit naatsumik filmiliaat nunarsuarmi takuteqqaarneqarput aamma sakkortuumik oqaluttuarliorsinaanermik takutitsisoqarlu, tassani kalaallit kulturianni aamma pinngortitaanni assigiinngiiaassuseq patajaassuserlu takutinneqarput.

Naatsumik filmiliaq Anngeerdardardor (The Thief) immikkut malunnaateqarpoq. Filmi, Tasiilami pisimasumi, nukappiaraq Kaali oqaluttuarineqarpoq, taassuma qimmini ujaaraa aamma taamaaliornermi ingerlanerani paasivaa allaanerulluni qanoq ittuunersoq.  The Thief  nunani tamalaani nersorneqareerpoq Berlinimi takutinneqarluni aamma Odense Film Festivalimi Bedste Fiktionimik akissarsitinneqarluni – aamma NIFF 2025-mi Pitsaanerpaatut Naatsumik filmiliatut akissarsisinneqarluni.

Assi: Anngeerdardardor (The Thief) / Christoffer R. Stenbakken

NAPA-p festivalimut pulaartut marluk nuannaartut naapippai, Niklas Bak Hansen (27) aamma Ulloriaq Lennert (26), taakku marluullutik Anngeerdardardor (The Thief) festivalip alutornarnersaattut taavaat:

– Uannut taanna ukioq manna filmit pitsaanerpaat ilagaat, tassanimi Tunumit oqaluttuaq pingaarutilik takutinneqarpoq. Avataaneersunuinnaq filmiliaanngilaq, uatsinnulli kalaallinut allaneersunut  aamma filmiliaalluni, oqarpoq Ulloriaq Lennert.

Niklas Bak Hansen ilanngussivoq:

–  Uanga assorsuaq tanngassimaarutigaara, illoqarfigisannit filimi taama annertutigisumik akissarsitinneqarmat. Tunu kusanartumik pinngortitaqartoq tamatigut oqaluttuarineqartarpoq, kisianni uani aamma inuttai oqaluttuarsiaraagut. Tasiilarmiut assorsuaq pikkoripput, aamma ilitsersuisup Christoffer Stenbakkenip pikkorissutsiminnik takutitsinissaannut eqqortunik sakkussalersorsimavai.

Festivalip issittormiunik oqaluttuanik ukkataqarnera aamma Northern Lights Program aqqutigalugu patajaallisarneqarpoq, tassani Canadamit inuit aamma  Sápmit filmiliaat takutinneqarput.

Nunani Avannarlerni Siunnersuisoqatigiit filminut nersornaataat

Festivalimi siullerpaamik Nunani Avannarlerni Siunnersuisoqatigiit filminik nersornaasigassatut innersuussat takutinneqarput.

Filmertoqareermat NAPA-p siunnersuisua,  Pipaluk Lykke, filmiliortartunik oqaloqateqarpoq, isiginnaartut apeqqutaat ilanngullugit apeqqutigisarlugit. Filmi isiginnaariarneqarnerpaaq tassaavoq kalaallit piviusulersaarutitut filmiliaat WALLS – Akinni Inuk, taanna Nina Paninnquaq Skydsbjergimit aamma Sofie Rørdamimit ilitsersorneqarpoq, taanna aamma nunani tamalaani pitsaanerpaatut filmisut Kalaallit Nunaata Oscarimut ataatsimiititaliaanit innersuunneqarpoq.

Ikinngutigiit marluk, Niklas Bak Hansen aamma Ulloriaq Lennert, isumaqatigiipput  festivalimut peqataanertik nuannarisimallugu

– Assorsuaq pissarsiaqarfiusimavoq – filmiliarpassuit assigiinngiiaarput, pingaartumik Kalaallit Nunaannit, tamannalu ullut tamaasa takuneq ajorparput. Nuuk International Film Festivalimut peqataanermi, Kalaallit Nunaata sinnera qanoq isikkoqarnersoq immikkut takuneqarsinnaavoq, oqarpoq Niklas Bak Hansen.

Filmfestivalimi akissarsitinneqartut

Festivali ileqquusumik aamma nersornaasiivoq. Aakulu nersornaasigaasut:

• Nersornaat Innersuaq, Film.gl-ip nersornaasittagaat ilitsersuisumut pikkorinnerpaamut: Orsugiak – Grønlands hvide guld
• Naatsoq filmiliaq pitsaanerpaaq: Anngeerdardardor (The Thief) – Christoffer Rizvanovic Stenbakken (Danmark/Kalaallit Nunaat)
• Filmi pitsaanerpaaq: Wrong Husband – Zacharias Kunuk (Canada)
• Filimi piviusulersaarut pitsaanerpaaq: Qajaq Man – Joe Derrick (Danmark/Kalaallit Nunaat)
• NIFF Honorary Award: Liisa Holmberg, Arctic Indigenous Film Fund