Andachan Live på Hotel Sisimiut under Arctic Sounds

Issittormiut sammiviliiffiat aamma nunani avannarlermiut nipaat Arctic Soundsimi Sisimiuni

NAPA-p Kalaallit Nunaanni nipilersornikkut pikialaaqatigiinnermi annerpaami Arctic Sounds Festivalimi Sisimiuni pisumi  workshoppertitsinerni, attaveqarfeqalerfiusuni nunanilu avannarlernit nipinik tusarnaartitsinerni peqataaneranit oqaluttuaq
Arctic Sounds 2021 aprilimi sapaatip akunnerisa naanerini marlunni ingerlanneqarpoq. Kalaallit issittormiullu nipilersortartut eqqumiitsuliortullu Sisimiuni nipilersorneq, nipilersoqatigiinneq aamma nipilersornikkut piginnaasalinnik paarlaateqateqarneq ataatsimoorutigaat. Tusarnaartitsinernut tamarluinnarnut isissutissat nunguissimaneranni – tusarnaariarnissamut qilanaarneq qujamasunnerlu kisimiuvoq nipilersornerullu kulturia tamani takussaalluni. Tusarnaariani appisimaartussanilu. Pisussat allattorsimaffianni ilaatigut uku ilaapput: ÎVA, Da Bartali Crew, FINNi, Andachan, Ivaana aamma Zika. Pikialaartitsinermi oqaluffimmi inuit ikitttunnguit isersimafigisassaanni, kulturikkut illorsuarmi Taseralimmi inuppassuit isersimafigisinnaasaanni aamma Katersortarfimmi tusarnaartitsisoqarpoq, soorluttaaq Hotel Sisimiuni immikkut ittumik meeqqanut inuusuttunullu tusaarnaartitsisoqartoq. Taakku saniatigut allanik pisorpassuaqarpoq: Attaveqarfeqalerniarluni naapisimaarnerit, masterclassit (misilittagaqarluartut pikkorissaaneri) aamma sammisaqartitsilluni workshoppit pipput. Arctic Sounds sammisaqartitsisarnini taasarpaa ‘Nordic playgrounds’  ilisimasanik paarlaasseqatigiinnerit, naligiinnerit aamma pilersitseqatigiinnerit taakkunani pisarmata. NAPA-meersoq Per Bloch pikialaartitsinermut peqataanermini, Nunani Avannarlerni, issittumi oqaatsit kulturillu akornanni suleqatigiinnerit eqeersarniarlugit Arctic Sioundsimi aaqqissuisut peqatigalugit arlalinnik suliaqarpoq. Do It Together Arctic Soundsimi pikialaartitsisarnemi aqutsisoq Jacob Froberg peqatigalugu NAPA nipilersortartunik nipilersornermillu aaqqissuussisartunik nammineq nipilersuusianik saqqummersitsisinnaanermik imaqartumik, internetti atorlugu webinarikkut naapeqatigiissitsivoq. Zoom aqqutigalugu saqqummiisoqareermat nunanit avannarlernit peqataasut pingasut apeqquteqarput. Aaqqissuussineq Serravimmi, Sisimiuni Nipilersornermik Ilinniarfimmi ingerlanneqarpoq, Arctic Soundsimi aaqqissuisut ilaaqqullugit qaaqqusimasaannit streamerlugu peqataaffigineqarluni. Nunat Avannarliit anersaavat eqqorluinnarlugu oqallinnermi sammisat kalaallit siunissami nipilersornikkut ineriartornissaannut tunngasuupput –(Do It Yourself (DIY) nammineernermit (Do It Together (DIT) suleqatigiigitsimut – nipilersukkat nammineq nunagisami aamma nunarsuup sinnerani siaruarnissaannut tunngallutik.   Qaaqqusavut isummersueqataallutillu oqalliseqataasut tassaapput: Kristoffer Rom – nuusiorfik Tambourhinoceros aamma Danske Uafhængige Pladeselskaber (DUP) Nana Jacobi – nipilersortartoq HUN SOLO, Arctic Soundseqarnerani internettikkut appisimaaqataasoq Kristian Blak – Savalimmiuni nuusiorfik TUTL. Nipilersornerup innaallanneri NAPA “Nordic Playground”-imi nipit atorlugit saqqummiisarnermut tunngasumik sammisaqartitsivoq. Nipilersortartoq producerilu Jesper Skovgaard aamma Noosfære-mik taalluni Nuuk Nordisk Kulturfestival 2019-imi tusarnaartitsisoq, internettikkut video atorlugu nipilersornermik nutaaliorneq pillugu ilitsersuillunilu isummersuivoq. Aallarniuteqarnerani apeqqutivut akitereeratsigit kingorna nipit, toortakkat nipilerinermilu periarfissat pinnguaralugit aamma misilerarpavut. Arctic Soundsip Serravimmit, Sisimiuni Nipilersornermut Ilinniarfimmit aallaaveqarnera pikialaartitsinerup sinnerani pisunut sunniuteqarportaaq. Nordic Playground tunngavigalugu meeqqanut inuusuttunullu 10-niit 15-inut ukiulinnut podcastiliornermik sammisaqartitsivugut. Taamaaliornikkut Kalaallit Nunaanni inuusuttuuneq pillugu meeqqat inuusuttullu imminnut ilisimaarinerulerlutillu oqaaseqarsinnaanerat sammitinneqarpoq. Ualip ingerlanerani siutittorsimaarneq, ersinartulersaarneq, atuakkanik immiussineq aamma nammineq immiussineq (podcast) suliaraavut, qarasaasiaq atorlugu pinnguarluta killuillutalu. Siunissami immaqa podcastiliortartussamaativut? Oqaaseq nuannarinerpaasaq aamma ilitsoqqussaralugu oqaatsit Pikialaartitsinerup nalaani Kitaani illoqarfiit ilaanni tassani innuttaasut arfinillit aamma NAPA-mit immiunneqarput. Taakkulu apersornerat tassaalerpoq NAPAp podcastiliaasa sisamassaat. Podcastiliat taaguuteqarput (N)ORD – nunani avannarlerni oqaatsit atorneqartut oqaatsillu ataasiakkaat. Immiussaq tassaavoq ”Kalaallisut oqaaseq nuannarinerpaasat sunaava?” (Hvad er dit yndlingsord på grønlandsk?) Peqataasut tassaapput inuusuttut Serravimmiittaartut – Nanna, Iluuna aamma Apia – aamma pikialaartitsinermi aaqqissueqataasut: Laura Lennert Jensen, Kimmernaq K. Heilmann aamma Salik Parbst Frederiksen. Podcasti tusarnaarutigisartakkat atorlugu tusarnaaruk – Nordens Institut i Grønland imaluunniit (N)ORD ujassavat – imaluunniit nittartakkatsinni nassaariuk.  Ataatsimoorneq paarlaateqatigiinnerlu NAPA angalatitaqartilluni issittumi inuunermi atukkanik siuarsaanissaq paasissutiginiartarpaa. Kalaallit Nunaanni sila naalagaammat kingunerisarpaa pilersaarutit nalileqqillugillu allanngortittariaqartarnerat, silammi  anorersualernera nalaanneqarmat Sisimiuniit Sisimiunullu angallannerit kinguaattoornermik uniinnartariaqalernermillu kinguneqarput. Taama pisoqartillugu eqqarsapallannissaq pisariaqartarpoq, qujanartumillu tamanna Kalaallit Nunaanni sungiusimaqaarput kakkaffigalugulu. Arctic Sounds pisunut suleqatigiinnissamullu qitiulluinnarpoq. Soorlu Arctic Soundsimi pikialaartitsisarnermi aqutsisoq Jacob Froberg oqartoq: NAPA tapiisartuinnaanngilaq, suleqataavormi pingaaruteqartoq. Taama oqarneq NAPA-mit naammagisimaaqaarput, tassami Arctic Soundsip – NAPA-tulli – nunani avannarlerni suleqatigiinneq issittumi suleqatigiinnertut isigalugulu nittarsaappaa. Nipitut (sounds) piinnarnagu, kisianni ataatsimoorluni sorpassuit paarlaateqatigiissutiginerisigut. www.arcticsounds.gl Arctic Sounds Youtube-mi ukioq manna tusarnaartitsinerit ilaat takuneqarsinnaapput NAPA-p podcastii (N)ORD Assit: Nuka Kristiansen, Maria Camilla
Allat
NAPA Arctic Winter Gamesimut inuusuttunik isiginnaartitsisussanik ujartuivoq

Inuusuttut Kalaallit Nunaanni tamaneersut Arctic Winter Games 2026-imi kulturikkut aaqqissuussamut Canadami Whitehorsemi ingerlanneqartussamut misiliinissamut qaaqquneqarput. 14-it 20-llu akornanni ukioqaruit, kulturi, isiginnaartitsineq nunanullu allanut Kalaallit Nunaat sinnerlugu peqataanissaq nuannarigukkit, maannakkut Arctic Winter Games 2026-mi Canadami Whitehorsemi kalaallit kulturikkut aallartitaannut ilaanissamut periarfissaqarputit. NAPA – Nunani Avannarlerni Piorsarsimassutsikkut

Atuarnerugit »
Skærmbillede af NAPAs ansøgningsmodul
NAPA-p kulturimut tapiisarfianut nutaamut qinnuteqaat siulleq tigusimavaa

NAPA nutaamik nittartagartaarpoq nutaamillu Kulturimut tapiisarfimminut qinnuteqartarfittaarluni. Nittartagaq nutaaq atulerniariartoq qinnuteqaat siulleq takkuppoq: Ilulissani Maniitsumilu meeqqanik inuusuttunillu pinngorartitsinikkut workshoppertitsineq pillugu qinnuteqaat. Qinnuteqartarfiup nutarsarneratigut NAPA-mut qinnuteqarneq ajornannginnerulerpoq. NAPA-p nittartagartaavani ilaatigut suliniutit taperneqarsimasut pillugit atuartoqarsinnaavoq aamma nammineq qinnuteqaatissamut isumassarsiortoqarsinnaalluni. Oqaatsit soorunami pingasut atorlugit atuartoqarsinnaavoq: Kalaallisut, skandinaviamiusut tuluttullu.

Atuarnerugit »
Maanna Issittumi Suleqatigiinnermut Tapiissuteqartarfimmut qinnuteqartoqarsinnaalerpoq

1. december Nunani Avannarlerni Ministerit Siunnersuisoqatigiivisa issittunut aningaasaateqarfia ammarpoq. Ulloq 13. januar NAPA Issittumi Suleqatigiinnermut Tapiissuteqartarfik pillugu webinarertitsissaaq. Issittumi Suleqatigiinnermut Tapiissuteqartarfimmut ukiumut qinnuteqarnissaq maanna ammarpoq. Qinnuteqartussat nutaat qinnuteqareersimasullu aningaasaliiffigineqarnissamut maanna nittartakkatsigut qinnuteqarsinnaalereerput. Qinnuteqarnissamut piffissaliussaavoq ulloq 15. februar 2023. Aamma ullorsiutinni ulloq 13. januar nal. 10.00

Atuarnerugit »
UNLEASH Kalaallit Nunaat qinnuteqarfigineqarsinnaalerpoq

Ullut 20. aamma 27. august 2022 akornanni UNLEASH Nuummi nunap immikkoortuani pinngorartitsiffiliorniarpoq! Tassani inuusuttut piginnaanillit Issittormiut-Nunat Avannarlermiut 200-t 18-35-nik ukiullit katersuutissapput. Nunanit taakkuninnga tamanit inunnit ikiuisartunit ilisimasaqarluartunillu ikiorneqarlutit Piujuartitsilluni Ineriartortitsinissaq pillugu Nunarsuarmi anguniagassap anguneqarnissaanut pinngorartitsillutit nutaaliorlutit ineriartortitsisinnaavutit. Taakku saniatigut illit pilersaarutitit anguniarlugit eqimattani sulissaatit! UNLEASH

Atuarnerugit »