ILLERNGIT aqqusiaraagut – Nuummi aamma Sisimiuni workshopertitsinerit marluk iluatsilluartut
Ulluni 8. aamma 10. oktobarimi NAPA Kalaallit Nunaanni nutaaliorsinnaasut aamma avataanit suliaqartut Kalaallit Nunaanni eqqumiitsuliornermik- aamma kulturikkut suliniutinik suliaqarniartut akornanni ataqqinnittumik suleqatigiinnernik pitsaasunik pilersitsisinnaanerit pillugit workshopertitsivoq.
Kalaallit Nunaanni eqqumiitsuliortut aamma nutaaliorsinnaasut inunnik kulturikkut suliniutinik suliaqarniarlutik Kalaallit Nunaannut tikittunik pitsaasunik aamma pitsaanngitsunik sunik misilittagaqarpat? Kalaallit kulturiannut, najugaqartut ilisimasaannut aamma ileqquinut innimiginnittoqartarpa? Suunuku inuit avataaneersut kalaallit kulturia pillugu paasinerlukkajuttaraat, imaluunniit ilisimasanngikkaat? Ataqqinnittumik suleqatigiinneq qanoq isumaqarpa, sulinermi aamma qanoq isikkoqarpa?
Apeqqutit taakku allallu Nuummi aamma Sisimiuni workshopertitsinerni marlunni oqaluuserineqarput. Malittarisassanik avataaneersunut Kalaallit Nunaannut suliartorlutik tikinnginneranni kulturikkut pitsaanerusumik paasinnissutaasussanik pilersitsinissaq anguniarneqarpoq. Ass. inuit filmiliornermik imaluunniit eqqumiitsulianik saqqummersitsinermik suliaqartut.
Kalaallit nutaaliornermik suliaqartut arlallit malittarisassanik aamma ikiorsiissutinik aamma tapersersuinernik taamaattumik ujartuipput, avataaneersunut Kalaallit Nunaanni pissutsit qanoq innerannik nassuiaasarumanatik, aammalu tamatigut taamaaliortuaramik. Malittarisassat suleqatigiinnerup aallartinnginnerani, kalaallit kulturiannut paasinninnissamut aamma ataqqinninnissamut aamma naligiinnermut tapertaanissaat neriuutigineqarpoq.
Workshopertitsinerni eqimattakkaarluni arlaleriarluni suleqatigiittoqarpoq, peqataasut eqqumiitsulioriaatsinit aamma kulturinit assigiinngitsunit amerlasuuneersut qulequtaq oqallisigaat, saqqummiinernik aamma ataatsimoorluni oqaloqatigiinnernik malitseqartunik.
Naja Parnuuna Vahl Olsen, nipilersortartoq aamma festivalertitsisarnermi sulisoq, Nuummi workshopimi peqataavoq, oqaluttuarporlu:
“Maani peqataaneq isumassarsiortitsillunilu pissarsiaqarnarpoq. Pingaartumik kulturerput inuiaqatigiinnut annertuumik pingaaruteqarmat aammalu inunnut avataaneersunut takusassiaannaassanngimmat. Avataani suliaqartunik suleqateqarnermi pissutsit suut maluginiaqartariaqarnerannik, suut mianersuunneqassanersut, aammalu suleqatigiinnerit taamaattut sunik periarfissiinerinik aamma iluanaarutitaqarnerinik ammasumik oqaluuserinninneq nalituvoq. Aaqqissuussat assingusut siunissami akulikinnerusumik ingerlanneqartarnissaat neriuutigaarput.”
Workshopernerit suliniummut annerusumut “ILLERNGIT”-nik taaneqartumut ilaapput. AneMarie Ottosen, suliniutinut aqutsisoq aammalu taaguusiisoq nassuiaavoq:
“Suliniuterput taaguuteqarpoq, ILLERNGIT, eqqumiitsuliornermik aamma kulturimik suliaqaraanni allat aqqutaat siullermik malinneqakkajuttarmata, tamatumalu kingorna aqqutinik nutaanik pilersitsilluni allanullu naapitanut pilersitsiniaraanni avitseqatigiissutigalugit. Inuit avataaneersut kikkunnut aamma sunut ornigunnerlutik paasinninnissaat uagutsinnut pingaaruteqarpoq. Kinaassuserput pinngortitamit pilersitaavoq, sulilu pinngortitamut ataqqinnittoqarpoq. Inunnut suleqatigisassanut ataqqinninnissaq pingaaruteqarpoq, suleqatigiinnerlu naligiiffiussaaq. Nunami najugaqartut pilersitsiniaraanni aqqutit sorliit atorneqarnissaat nalunnginnerusarpaat. Taamaattumik nunamut tikikkaanni aamma tikeraaraanni imaluunniit suligaanni tamatuma ataqqineqarnissaa pingaaruteqarpoq.”
Workshopernerit inerneri – aamma suliniut ataatsimut isigalugu – ataatsimiinnernit allagaatit suliarineqareerpata aamma malittarisassanut aalajangersimasunut inissinneqareerpata, nunanit allanit suleqatigisartakkanut saqqummiunneqassapput.
Suliniut NAPA-mit aaqqissuunneqarpoq, Saamit siunnersuisoqatigiit suleqatigalugit, tapiissuteqartuuppullu Nordisk Kulturfond, Eqqumiitsuliornermut Aningaasaateqarfik – Grønlands Kunstfond, Sermeq Puljen, Kommuneqarfik Sermersooq, Tips- og lottomidlerne aamma KATUAQ.
