NAPA eqqumiitsuliornermut kultoorimullu suliniutinik 520.000 koruuninik aningaasaliivoq
NAPA-p, Nunani Avannarlerni Piorsarsimassutsikkut Attaveqaatip siulersuisui februaarimi aalajangerput suliniutit tallimat immikkuullarittut aningaasaliiffiginiarlugit.
NAPA-p Kulturimut Tapiisarfia eqqumiitsuliornermi kulturikkullu suliniutit arlallit meeqqanut inuusuttunullu, piujuartitsinermut aamma issittormiut sammiviliiffiat tunngassuteqartut aningaasatigut annertuumik tapiiffigineqarput. Qinnuteqaatinik tunniunnissamut piffissaliussaq 1. februar 2024 qaangiutinngitsoq NAPA qinnuteqaatinik pitsaasunik amerlasuniik tigusivoq, tamanna nunatsinni nunanilu avannarlerni pimoorussinermut pinngorartitsinermilu pisuussuteqarnera uppernarsaataavoq.
Taamaattumik qinnuteqaatit pitsaasut taama amerlatigillutik NAPA-p siulersuisuisa suliniutit sorliit kulturikkut ineriartornermik, inuusuttut peqataanerannik issittormiulu sammiviliiffianik suliniuteqartoqartunit pitsaanerpaat toqqarnissaat ajornaatsuinnaasimanngilaq. Misissueqqissaareernerup kingorna suliniutit tallimat toqqarneqarput:
SIPINEQ+ – Naapitta – Issittumi nunat inoqqaavisa kulturikkut paarlaasseqatigiittarnissaannik pilersaarusiorneq. Kalaallit Nunaanni 2SLGBTQIA+ peqatigiiffik, Sipineq+ 100.000 koruuninik tapiiffigineqarpoq.
Dansehallerne – Angalanera – qitinnermik naapitsineq kalaallit, savalimmiormiut, Ålandimiut qallunaallu meerartaannik peqataaffigineqartoq – 100.000 koruuninik tapiiffigineqarpoq.
Plus Pictures – Atuarfik – Kalaallit Nunaanni meeqqat atuarfianni atuartut malinnaaffiginiarlugit filmiliornissamut suliniut 50.000 koruuninik tapiiffigineqarpoq.
Katuaq – Katuarpalaaq. Kalaallit Nunaanni kulturikkut illorsuaq Nuummi qilaatersornermik festivalimik aaqqissuussissaaq. Katuaq 120.000 koruuninik tapiiffgineqarpoq.
Arctic Sounds 2024-mi festivalertitsinernut, angalanernut immiussinermullu aningaasartuutigineqartunut, katillugit 150.000 koruuninik tapiiffigineqarumaarpoq.
Aammattaaq Nuuk International Film Festival 200.000 koruuninik tapiiffigineqarpoq festivalip 2023-mi ukiakkut NAPA-p Kulturimut Tapiisarfianut qinnuteqaateqarnerata kingorna, tassanilu siulersuisut isumaqatigiissutigaat upernaakkut qinnuteqaatit tunniunnissaannut piffissaliussaq sioqqullugu filmfestivali 200.000 koruuninik tapiiffigissallugu.
Suliniutit assigiinngitsorpassuit, soorlu kulturikkut paarlaasseqatigiittarnerit qitinnerlu, filmiliorniarnerit qilaatersornerillu, NAPA-p kulturikkut suliniutinik assigiinngitsorpassuarnik tapersersuinissamut pisussaaffeqarneranut ersiutaapput.
Elin á Rógvi, NAPA-p siulersuisuini siulittaasoq, ukioq manna aningaasaliissutit pillugit naammagisimaarinnippoq: ”Suliniutit taakku tapersersorsinnaanerivut tulluusimaarutigeqaarput. Taakku tamarmik immikkut Kalaallit Nunaanni nunanilu avannarlerni inuiaqatigiit kulturikkut ineriartornerannut tapersiiginnanngillat, aammali piujuartitsinermik, inuusuttunik peqataatitsinermik issittormiullu inuunermut paasinnittariaasiat takuneqarnissaanut siuarsaaqataapput. Neriuppugut suliniutit taakku nunani avannarlerni nutaaliornissamut suleqatigiinnermullu kajumississutaajumaartut.”
NAPA-p Kulturimut Tapiisarfianut qinnuteqartut tamaasa qutsavigivagut.
Ukioq manna NAPA-p Kulturimut Tapiissarfianit 3.050.000 koruunit agguaanneqassapput. 99.999 koruunit tikillugit aningaasartuutinut qinnuteqaatit qaammatit tamaasa juulip 15-iat minillugu tunniunneqartarput. 200.000 koruunit tikillugit aningaasartuutinut qinnuteqaatit septembarip aallaqqaataani tungaanut tunniunneqarsinnaapput.
NAPA-p siulersuisui ukuupput:
Elin á Rógvi, NAPA-p siulersuisuini siulittaasoq 2023-2025
Kai Latvalehto, NAPA-p siulersuisuini siulittaasup tullia 2023-2025
Kristín Eysteinsdóttir, NAPA-p siulersuisuini ilaasortaq 2023-2025
Jakob Søvndahl Skovaa, NAPA-p siulersuisuini ilaasortaq 2023-2025
Søren la Cour Jensen, NAPA-p siulersuisuini ilaasortaq 2023-2025
Nutaarsiassat takunngitsoorpigit?
Pauliina Oinonen NAPA-mi pisortaagallartutut atorfinippoq
Pisortamik nutaamik atorfinitsitsisoqarnissaata tungaanut ingerlalluartumik ikaarsaariartoqarnissaa qulakkeerniarlugu, NAPA-mi pisortaagallartussamik toqqaanissaq aalajangerneqarpoq. Søren Würtz, NAPA-mi pisortaq, nalunaarpoq NAPA-mi atorfimminit apriilip 30-ani soraarniarluni. Pisortassamik nutaamik nassaartoqarnissaata tungaanut NAPA ingerlalluarnissaa qulakkeerniarlugu, Nunat Avannarliit Ministeriisa Siunnersuisoqatigiivisa Pauliina Oinonen pisortaagallartussatut toqqarsimavaat. Pauliina Finlandimeersoq januaarimi 2022-mi siunnersortitut NAPA-mi ilannguppoq. Taamanimiilli NAPA-p
Eqqumiitsuliorneq ataatsimoortitsisarpoq
Eqqumiitsuliorneq ataatsimoortitsisarpoq Eqqumiitsuliorneq kulturilu akiuussinnaanermut tunngatillugu oqallinnermi tamanna inerniliunneqarpoq. Ukioq manna NAPA-p Unnummi Kulturisiorfimmi internetikkut aaqqissuussivoq. Eqqumiitsuliortut kulturimillu aaqqissuussisut nunanit tamalaaneersut arfinillit qaaqquneqarput eqqumiitsuliornermut kulturimullu isiginnittaatsiminnik oqaluttuarinissaannut. NAPA-p pisortaa Susanne Andreasen internetikkut aaqqissuussinermut aqutsisuuvoq, oqaloqatigiinnerlu uani isiginnaarneqarsinnaavoq. Kuupik Kleist, politikeriusimasoq eqqumiitsuliortorlu misilittagaqarluartoq, aaqqissuussinermut peqataavoq oqaloqatigiinnerlu
Nunat Avannarliit Siunnersuisoqatigiit 74-issaa ataatsimiigiartut
Novembarip aallaqqaataaniit sisamaata tungaanut Helsinki, Finlandimi ataatsimiisitsisoqassaaq, tassanilu Doris J. Jensen aamma Mariane Paviassen peqataassapput. Ataatsimiisitsisoqarnermullu atatillugu Nunat Avannarliit Siunnersuisoqartigiivisa nersornaasittagaat novembarip aallaqqaataani aamma pissapput. Sessioni, nunat avannarlerni politikkikkut oqallitsitsineq annerpaaq, Helsinkimi, Finlandimi novembarip aallaqqaataaniit sisamaata tungaanut ingerlanneqassaaq. Nunat Avannarliit Siunnersuisoqatigiivisa ilaasortai 87-it, nunani avannarlerni
NNK 25.-28. maj piareersarneqalereerpoq
Nuuk Nordisk Kulturfestival 2021 anersaartorfiullunilu siunissamut qaamanerusumut tikkuussisutullusooq issimavoq. Eqqumiitsuliortut kulturilerisullu assigiinngitsorpassuit oktoberip naanerani Nuuk tikeraarsimavaat. Ullut sisamat ingerlaneranni inuit 2.500-t missaat ullut 4-t ingerlaneranni ornigussimapput. Nunarsuarmit tamaneersut eqqumiitsuliortut kulturilerisullu 200-t saqqummersitsivinni nipilersorfinnilu allanilu 15-ini aliikkusersuillutillu saqqummiisimapput. Kommuneqarfik Sermersuup kulturimut immikkoortortaqarfiata festivali kingulleq aaqqissuuppaa, isumaqarpullu