ALLATTARL!

Allattarl!-ip inuusuttut assigiinngitsunik tunuliaqutallit katersorpai, nipilersorneq ataatsimoornerlu atorlugit inuusuttut  tassani piviusorsiorlutik peqataatinneqarlutillu ilinniartinneqassapput. Inuusuttut taakkua imminnut tatiginerat iliuuseqarnissamullu sapiutinnginnerulernissaat ineriartortinneqassapput. Pisussami tassani inuusuttut ataatsimoorlutik namminneq oqaluttuaminnik misigisimasaminnillu ilinniartitsisunit tapersersorneqarlutik takutitsissapput.

Nuummi NUIF-imi marlunngornermi apriilip 26-ani nal. 15.30-20.00 tamanut ammasumik siullermeerluni aaqqissuussisoqassaaq. Tassani Det Starter Med Musikken-ip kiisalu Nunat Avannarliit Piorsarsimassutsikkut Attaveqaataata, NAPA-p, suleqatigiinneratigut Allattarl! saqqummiunneqassaaq. Marlunngornernilu tulliuttuni marlunni Paamiuni Taqqissuuni Nanortalimmilu inuusuttut naapiffianni, klubbianni, tamanut ammasumik aaqqissuussisoqassaaq.

Rap-campinut Nuummi, Paamiuni Nanortalimmilu peqataanissamut oqaloqatigiinnissamullu soqutiginnittut tamarmik  tamanut ammasumik aaqqissuussinermi peqataasinnaapput. Pisuni taakkunani ilinniartitsisunik pikkorissunik isumassarsinartunillu naapitsinissaq periarfissaassaaq.

Sumiiffinni pineqartuni tamani Allattarl! ulluni sisamani tallimaniluunniit ingerlanneqartassaaq, tassani rapperneq, taalliorneq, nutaaliorneq nipilersornerlu sammineqassapput. Naggataatigut tusarnaartitsisoqarlunilu nalliuttorsiortoqassaaq.

Allattarl! piffissat sumiiffissallu  

Nuuk

Tamanut ammasoq: 26. maaji, nal. 15.30-20.00 NUIF-imi

Rap Camp: 27-30 maaji, nal. 15.30-21.00/17.00 i NUIF-imi

Tusarnaartitsineq: 31. maaji, Greenland Brewhousimi, piffissaa kingusinnerusukkut nalunaarutigineqassaaq.

Paamiut

Tamanut ammasoq: 2. juuni, nal. 16.00-21.00 Taqqissuuni

Rap Camp: 3.- 5. juni, nal. 16.00-21.00/22.00 Taqqissuuni

Ulloq tusarnaartitsiffik: 6.juuni timersortarfimmi, piffissaa kingusinnerusukkut nalunaarutigineqassaaq.

Nanortalik

Tamanut ammasoq: 9. juuni, nal. 16.00-21.00 inuusuttut klubbianni

Rap Camp: 10-12. juuni, nal. 16.00-21.00/22.00 inuusuttut klubbianni

Ulloq tusarnaartitsiffik: 13. juuni, piffissaa sumiiffissarlu kingusinnerusukkut nalunaarutigineqassapput. 

Inuusuttut aqqaneq-marlunnit 28-t tikillugit ukiullit akeqanngitsumik peqataasinnaapput. Rap campimut peqataaniarluni nalunaaqqaarnissaq pisariaqarpoq. Tamanut ammasumik aaqqissuussinerni nalunaartoqarsinnaassaaq.

Ilinniartitsisut:

Andachan – produceri (ALLATTARL! – Nuuk, Paamiut aamma Nanortalik)

Andachan kalaaliliuvoq elektroniskimik nipilersortartoq, nunatsinnilu nipilersornermik nuannarisaqartut akornanni malunnaateqartuuvoq nutaaliortarlunilu. Nipilersukkat elektroniskiusut, nipilersuusiorneq aamma nipinik misileraanerit akuleriissillugit suliarai, nipilersukkat nutaaliat Kalaallit Nunaanni kulturimut oqaatsinullu innersuussutillit akulerutsillugit.

Angutitsiaq (Angukasik) – rappertartoq aamma nipilersortitsisoq (ALLATTARL! – Nuuk)

Angutitsiaq, aamma Angukasik-imik ilisimaneqartoq, nunatsinni hip-hopertartut akornanni tusaamasaalluartuuvoq, taalliortutut iluminniittunik sapernarsinnaasunik taalliortartutut ilisimaneqarpoq. Eqqumiitsuliornermini Nuummi inuuneq illoqarfimmilu inuiaqatigiit qanoq ingerlanerat aallaavigisarpai.

Bigg Kaka – nipilersornikkut ALLATTARL!-imik aqutsisoq (ALLATTARL! – Nuuk, Paamiut aamma Nanortalik)

Bigg Kaka Danmarkimi rappertartuuvoq hip-hopimik nipilersortartut misilittagaqarnerpaat ataqqisaanerpaallu ilagisaat. Kuultinnattutut platininnartutullu nersornaaserneqarsimavoq, Danmarkimilu festivalini annerni tamani tusarnaartitsisarsimalluni. Bigg Kakap sukkasuumik periaaseqarnini tusarnaartitsinernilu nukissaqarluartarnini nuannarineqaatigilluarpai. Tusarnaarianullu sunniuteqarluartumik attaveqarluarluni nipilersortarnini ilisimaneqaatigaa. Nipilersuutai hip-hopimik nipilersuutinit nalunnginneqartunit nutaaliaanerusunut assigiinngitsorpassuarnik imaqarput.

Finni – erinarsortartoq taalliortorlu (ALLATTARL! – Nuuk, Paamiut aamma Nanortalik)

Finn Lynge Frederiksen Kalaallit Nunaanni nipilersortartut malunnaateqarnerpaat ataqqisaanerpaallu ilagaat. Sisimiuni najugaqarluni ukiuni qulikkuutaani arlalinni assigiinngitsorpassuarnik suliaqartarsimavoq, soorlu erinarsortartutut, taalliortutut immiussisartutullu. Pop-rockimik nuannersumik aamma itisuumik isumaqarluartumillu taalliortuusimalluni. Nipilersoriaasia assigiinngitsorujussuuvoq – tusarnaartitsinernit kulturilerisut allat nalunnginneqarluartut teknikkikkut sullinnerinut.

Iris Poparic – rappertartoq, ilinniartitsisoq eqqumiitsuliornermillu siammarterisartoq (ALLATTARL! – Nuuk, Paamiut aamma Nanortalik)

Iris Poparic rappertuuvoq, erinarsortartoq, eqqumiitsuliornermillu siammarterinermik suliaqartarluni. Ukiut qulit sinnerlugit rappernermik sungiusaasutut misilittagaqarpoq, tassani ilinniartitsinermik, ilinniutinik ineriartortitsinermik, suliniutinik inuusuttunullu nutaaliornermik piviusunngortitsisumik sulianik suliaqartarsimalluni. Iris tamatuma saniatigut Roskilde Festivalimi tusarnaartitsisarsimavoq, nipilersortartoq Tobias Rahim suleqatigisimavaa aamma Headspace-mi suliniummik ataqatigiissaarisutut suliaqarsimalluni.

Lucas — eqqumiitsuliortoq ikiortilu (ALLATTARL! – Nuuk)

Lucas eqqumiitsuliortuuvoq assigiinngitsorpassuarnik suliaqarsinnaasoq, kalaallinit, danskinit Iranimiunillu kingoqqisuulluni sorlaqarfeqarpoq. Taamaasilluni kulturikkut immikkuullarissumik ilisimasaqarpoq siammasissumillu isiginnittaaseqarluni. Reggae, dancehall hip-hopilu atorlugit nipilersorpoq, itisuunik taalliortartuunini assilianngortitsisarninilu ilisarnaatigai.

Minik Hansen – taalliortoq ilinniartitsisorlu (ALLATTARL! – Nuuk)

Minik Hansen taalliortuuvoq taalliornermik namminneq imminut ilinniartissimasoq.Kalaallit reggae-nik nipilersoqatigiivini, Sauwestari-mi, taalliortartutut ilisarisimaneqarneruvoq, nipilersornermik oqaluttualiornermillu ataatsimoortitsisunik taalliortarpoq. Kalaallisut allakkajuppoq oqaatsit eqqorluartumik atortarpai ilusilu, rytmi naggateqatigiiaarinerillu ataqqillugit.

Parnaq – rappertartoq siunnersuisartorlu (ALLATTARL! – Nuuk)

Parnaq Kalaallit Nunaanni arnani rappertartuni siullersaavoq, hip-hopillu ineriartornerani qitiusumik inissisimaffeqarluni. Ilulissani sorlaqarnini Nuummilu nukittuumik tunuliaqutaqarnermigut eqqumiitsuliortut nutaat nipaat aqqutissiuussimavaa – ingammik arnat inuusuttut akornanni.

$MALIKK – rappertartoq aamma produceri (ALLATTARL! – Nuuk)

$MALIKK qallunaajuvoq kalaaliullunilu, produceriullunilu rappertartoq. Nuummi peroriartortoq, kalaallisut danskisullu tamakkiisumik oqalussinnaasoq. Nukissaqartuunini akuersiinnarusunnginninilu ilisimaneqaatigai, punki old school hip-hopilu akuleriisillugit inuusuttunut, kinaassutsimut, kulturikkullu assigiinngissuteqarnermut tunngasunik oqaluttuartarpoq.

Tunuliaqutaasoq:

Nunani Avannarlerni Piorsarsimassutsikkut Attaveqaat Allattarl!-imi Det Starter Med Musikkenimik kulturikkut suleqateqateqarnermik pilersitsivoq. Inuusuttut tusaaneqarsinnaatinneqalerput taamaalillutik ataatsimoorlutik namminneq oqaluttuaminnik ineriartortitsisinnaapput, nammineq misigisaminnik inuunerminnilu pisunik nipilersorneq taallallu atorlugit suliaqarsinnaanermik periarfissinneqarput. Allattarl! najukkami tapersersorneqarnermit aallaaveqarpoq. Tamanna inuusuttut tusaaneqarnissaannut nipilersortarfimmilu qeqqillutik saqqummernissaannut nukittorsaataassaaq. Taanna aamma tassaavoq allakkanik unammisitsinerup aamma oqaluttualianik atuakkiat Allatta!-p NAPA-mit allanillu 2013-imiilli ineriartortinneqartup ineriartorteqqinneqarnera.

Det Starter Med Musikken 2018-imiilli rappernermik sungiusarnernik 20-nit amerlanerusunik aamma inuusuttut 350-it sinnerlugit peqataaffigisinnaasaannik nipilersornermik ilinniartitsinernik annertuunik ingerlataqarsimavoq. Rap Camp tassaavoq nipilersornermik ilinniartitsineq piffissami sivikitsumi annertuumik ingerlanneqartoq, tassani inuusuttut rappertunik, producerinik aamma coachinik toqqissisimasumik piviusorsiortumillu suleqateqartarput. Taama iliorneq eqqumiitsuliornermik inuiaqatigiinnilu ineriartornermik nukittorsaasarput. Siornatigut peqataasimasut misigisaminnik oqaluttuarput, misilittakkat inuunerminnik allannguisitsisut, nutaanik ataatsimoorfeqalerlutik, scenemut, tassa nipilersorfimmut, sassarnissamut sapiissuseqalerlutik – aamma misigisimavaat nipimik naleqangaartoq.

Allattarl!-imi takuss!

Aaqqissuussineq makkuninnga tapersersorneqarpoq: NAPA – Nunat Avannarliit Piorsarsimassutsikkut Attaveqaataat, Tusass, NunaFonden, Kalaallit Nunaanni Eqqumiitsuliornermik Aningaasaateqarfik, Kommuneqarfik Sermersooq, Greenland Brewhouse, Bolt Lamar, LC Music aamma Koda.