Allannermik workshoppi: Kikkuuvugut?

Franskeq assiliisartoq Charlotte Lakits suleqatigalugu NAPA inuusuttunut allannermik workshoppertitsisarpoq. Eqqarsaatinit pappiaramut, Kalaallit Nunaanni ullutsinni inuusuttut ilisaritillugit.

 

Allannermut workshoppit Charlotte Lakitsip aallartitarai, taanna Kalaallit Nunaanni arlalinnik kulturikkut suliniuteqartarsimavoq. Nuuk Nordisk Kulturfestival 2019 ilaatigut peqataaffigisimavaa, NAPA-p Kulturimut tapiisarfianit aningaasaliiffigineqarsimalluni. Maanna suliniutimigut “Who We Are” nunatsinni ullutsinni inuusuttut kikkuunersut aperai.

 

“Inuup assingi 100-t”-mik taallugu suliniummi kinguaariit maanna inuusuttuusut assinginik 100-nik katersinissaq anguniagaavoq. Nuummi inuusuttuni assigiinngiiaassuseq nukissallu takutinneqassapput. Allaaserinnilluni aamma assiliilluuni inuup assingi – Charlottemit assilisat aamma inuusuttunit nammineq allaaserisat.

 

Atuakkiortut Pivinnguaq Mørch (KAL) aamma Per Bloch (QALL) inuusuttut allanneranni isummersorlugit peqataasarput. Taakku peqatigiillutik Nunatta Atuagaateqarfia Nuummiittoq suleqatigalugu  siusinnerusukkut allannermik workshoppertitsisimapput.

 

Pivinnguaq Mørch Nunat Avannarliit Siunnersuisoqatigiivisa Atuakkiortumut Nersornaasiuttagaanut siusinnerusukkut innersuunneqarsimasoq meeqqanut atuakkiortarpoq, oqaluttualiortarluni taalliortarlunilu. Per Bloch eqqumiitsuliornermik suliaqarnermi saniatigut NAPA-mi attaveqaqatigiinnermut akisussaasuuvoq, taamaalillunilu NAPA-p kulturimut tapiisarfianit immikkut ittumik suliniut taperneqarsimanngilaq, allannermulli atatillugu suliffimmut aningaasaliissutaareersut aqqutigalugit aningaasaliiffigineqarsimavoq.

 

Peqataasut allannermut piukkunnarsarneranni Pivinnguaq Mørchip aamma Per Blochip namminneq allakkaangamik suleriaatsit atukulanerusatik pillugit saqqummiisarput. Peqataasut namminneq aalajangertarpaat kalaallisut, tuluttut danskisulluunniit allassanerlutik.

 

Manna tikillugu qulaanisut ittunik peqataasoqartunillu marlunnik workshoppertitsisoqarsimavoq. Ukiaq 2020-mi pisimapput. Periarfissaqaqqilerutta ingerlateqqissavagut.