Pinngorartitsinermik suliffeqarfiit ineriartortiguk nunani tamalaani attaveqaqatigiinnermillu pikkorissarit

Apriilip 26-anniit 28-at ilanngullugu NAPA-p suliniutaa Creative Business Academy Kalaallit Nunaanni aallarnisaasunut, suliffeqarfinnut inuinnarnullu ataasiakkaanut nunanit tamalaanit peqataaffigineqartumik aaqqissuussiniarpoq. Aaqqissukkap siunertaraa pinngorartitsinermik inuussutissarsiorlutik sulisut arlaatigulluunniit suleqateqartartunut nunanit tamalaanit attaveqarfigilluarnerulernissaat, nunanut allanut nittarsaassinissamut periusissiorsinnaanissaat aamma niuernermik ineriartortitsinermut periarfissaqarnerulernissaat.

Nunanit allaneersut arlallit siunnersuisussatut qaaqquavut, ulluni pingasuni workshoppit ataatsimiinnerillu ingerlanneqassallutik. Siunnersuisussat aallarnisaasunillu nunanit tamalaaneersunit, kangianeersunit kitaaneersunit – USA-meersunit, Canadameersunit soorunami aamma nunanit avannarlerneersunit – siunnersorneqarsinnaavutit.

Inuttut ataasiakkaatut oqaloqatigiinnerit, attaveqaqatigiinnerit ataatsimiinnerillu aqqutigalugit nunani allanut piviusorsiortunik nioqquteqarnissannut nutaanik periarfissarsiorsinnaavutit. Creative Business Academy – International weekend pillugu paasisaqarnerorusukkuit NAPA allaffigisinnaavat napa@napa.gl

Pisussamut peqataaneq pinngorartitsisunut tamanut akeqanngilaq, kisianni aaqqissuussinermut peqataaniaraanni nalunaarutigisariaqarpoq. Immikkut aaliangiisoqarneratigut sineriammi allami najugalunnut NAPA-p Nuummut angalanissaamut aningaasaliisinnaavoq. Qinnuteqarusukkuit kinaanerlutit suullu pisariaqartinnerlugit nassuiarlugit allassaatit.

Siunnersuisussat allallu nunanit assigiinngitsuneersut niuernermut ineriartortitsinnermullu ilisimasalinnik avitseqatigiinniarlutik najuutissapput. USA-mi Canadamilu konsulatit, aallartitaqarfiit sinniisoqarfiillu peqataanissaat NAPA-p sulissutigaa.

Pilersaarutaagallartoq (allanngoriaannaavoq):

Tallimanngorneq apriilip 26-at:

Ammaanersiorneq

Sammisaq: Nunarsuarmioqataaneq nunanullu tamalaanut nittarsaassineq

Saqqumiinerit

Speed dating

Arfininngorneq apriilip 27-at:

Immikoortoranik sammisaqarneq – nipilersorneq, atisaliorneq, filmiliorneq, assassorneq il. il.

Immikkut ataasiakkaarluni ataatsimiinneq

NAPA-mi unnukkorsiorneq napinnerlu

Sapaat apriilip 28-at:

Siumut ingerlaarneq – tamanut ammasumik aaqqissuussaq

Aaqqissuussaq NAPA-p suliniutaanut, Creative Business Academy Greenlandimut ilaavoq, tassani sammisat aningaasaqarnikkut kulturikkullu piujuartitsinermik ataatsimoortitsinissaanut aallaaveqarlutik.

Kalaallit Nunaat kulturikkut pisuussuteqarluarpoq nunani tamalaani nipilersorneq, isiginnaartitsineq, atisaliorneq, filmiliorneq allarpassuarnillu periarfissaqarluarluni. Kulturikkut nukittuffiit niuernikkut periarfissanik nutaanik pilersitsisarput, tamannali piviusunngortinniarlugu Kalaallit Nunaanni kulturikkut eqqumiitsuliornermillu aallarnisaasut ilisimasanik avitseqatigineqartariaqarput. Nunani allani attaveqaqatigiittarfinnut niuerfinnullu attaveqarsinnaasariaqarput, namminneq ilisarnaatiminnik ineriartortitsinissamut, attaveqaqatigiiffinnik atuinissamut, pisinnaatitaaffinnik allarpassuarnillu ilisimasaqarnerulernissamut periarfissaqartariaqarput. Sapaatip akunnerata naanerani aaqqissuussamut pisariaqartitat taakkua matussusernissaannut aamma Kalaallit Nunaanni pinngorartitsinermik suliaqartut nukittorsarnissaannut iluaqutaassaaq.

Aningaasaliisut: Grønlandsbanken aamma Namminersorlutik Oqartussat Tips og Lotto-mik aningaasaateqarfiat.