NNK 25.-28. maj piareersarneqalereerpoq
Nuuk Nordisk Kulturfestival 2021 anersaartorfiullunilu siunissamut qaamanerusumut tikkuussisutullusooq issimavoq.
Eqqumiitsuliortut kulturilerisullu assigiinngitsorpassuit oktoberip naanerani Nuuk tikeraarsimavaat.
Ullut sisamat ingerlaneranni inuit 2.500-t missaat ullut 4-t ingerlaneranni ornigussimapput. Nunarsuarmit tamaneersut eqqumiitsuliortut kulturilerisullu 200-t saqqummersitsivinni nipilersorfinnilu allanilu 15-ini aliikkusersuillutillu saqqummiisimapput.
Kommuneqarfik Sermersuup kulturimut immikkoortortaqarfiata festivali kingulleq aaqqissuuppaa, isumaqarpullu iluatsilluarsimasoq.
Ulluni 28.-31. oktober Nuuk inuppassuarnik sammisassarpassuarnillu ulikkaarpoq. Atuanik atorniartarfimmi atuakkiortut pissanganartunik oqalugiartarsimapput, Katuamilu unnuit tamaasa nuannerluinnartunik tusarnaartitsisoqartarsimalluni.
Nuuk Kunstmuseumimi Jessie Kleemann aamma Jeanette Ehlers ataatsimut saqqummersitsisimapput, tassanilu Pia Arke eqqumiitsuliai aamma ilaallutik.
NuiF-imi meeqqanut inuusuttunullu akeqanngitsunik tusarnaartitsisoqartarpoq, taamaalillutik toqqissisimanartumi illumi nalunngisaminni festivalimut peqataasinnaasimallutik.
ANGALANEQ ikumasoq
Ukioq manna Kulturfestivalimut qulequtaavoq ’Angalaneq’.
Ukiut ataaseq affarlu Kalaallit Nunaat Coronamit tiguaqqaneqarsimasoq oqarsinnaavugut, kisianni neriuuteqaqqileriartorpugut.
Angalasinnaaqqilersimavugut. Timikkuinnaanngitsoq nunamit nunamut, kisianni aamma tarnikkut angalasinnaaqqilersimalluta.
Qaammaterpassuit immitsinnut qanillinaveersaarsimavugut, inuillu illersorniarlugit kulturimi misigisassat kingulliunneqartarsimallutik taamaalillutalu aliikkutassaqarpallaartarsimanata.
Nuuk Nordisk Kulturfestivalertoqarmat inuit qiimmassaatissaqarsimapput virusillu tarnikkut kalunniinit kiffaanngissusermut kulturit akornannut iperagaasutullusoq issimallutik, tassami tuniluunnersuup kulturi toqussinnaanngilaa.
Festivali ingerlaarnermik aallarnerneqarpoq. Odinteaterimit isiginnaaartitsisartut katersortarfimmit Nuuk Centerip tungaanut ingerlaarnermi atisalersorsimallutik nipilersorlutillu aliikkusersuipput. Ingerlaartut Katuap eqqaani unipput, tassanilu nipilersortoqartillugu festivalimi sammisatut qulequtaq ‘Angalaneq’ nivinngarneqarpoq innermmillu ikinneqarluni, taamaalillutik naqinnerit ikumasut takuneqarsinnaalerlutik.
Tamatuma kingorna inuppassuitNuuk Centerimukaapput, tassanilu borgmesteri aamma Kulturimut Naalakkersuisoq ammaanersiornermi oqalugiarput.
Kikkut tamarmik inissaqarput
Nuuk Nordisk Kulturfestival Kalaallit Nunaanni kisiartaalluni taamatut festivaliuvoq, aamma nunani avannarlerni taamaattut amerlanngillat. Festivalimi eqqumiitsuliornermi suliaq ataasiinnaaq sammineqarneq ajorpoq, tassalu nipilersorneq, assilialiorneq, ilisimatusarneq, atuakkialerineq aamma isiginnaartitsineq sammineqartarlutik.
Eqqumiitsuliortut suliamik takutinnissaannut tusaatinnissaannullu nutaaliaagaluttuinnartunik atortoqarlutik pinngorartitsisalernikuupput, tassalu festivali inunnut anersaartorfissatut ippoq tassanimi aliikkutassat nuannarinerusatik orniguuffigisinnaagamikkit.
Festivali aamma eqqumiitsuliortut misilittakaminnik imminnut avitseqatigiinnissaannut inissaqartitsivoq. Nutaanik attaveqarfeqalersarput suleqatigiilersarlutillu, aamma festivalip naammassinerata nalaani eqqumiitsuliortut kulturilerisullu, aamma sumiiffimmi innuttaasut pulaartullu/isiginnaariat/tusarnaariat nutaanik ilisimasaqalersarput aamma nutaamik unammillernartumillu eqqumiitsuliornissaminnut isumassartitinneqarsimallutik.
Aaqqissuinerit ilaat inuppaalunnit katersortitsisut ilaat tassaavoq talks/oqaloqatigiinnerit, taakku Ilinniarfissuup eqaarsaartarfitoqaani, maanna GUX-ip ataaniittumi ingerlanneqarput. Tassani tusarnaariat ullut tamaasa eqqumiitsuliortut kulturilerisullu Nuuk Nordisk Kulturfestival pillugu eqqartuisarput oqallillutillu
Siulersuisut tikeraartut
Kulturfestivalip aammaarluni ajunngeqqissaamik ingerlanneqarnerata saniatigut aamma kiisami siulersuisugut tikilluta angalapput.
NAPA-p siulersuisui 2020-mi toqqarneqartut siusinnerusukkut ornilluta ataatsimiigiarnissaminnut periarfissaqarsimanngillat. Taamaattumik Nuuk Nordisk Kulturfestivaleqarnera periarfissatsialassuusimavoq ilaasortat tallimaasut nunanit avannarlernit tamaneersut tikinnissaannut.
Siulersuisut aamma taamaalillutik “suleqatit” allat pilersaarutaanngitsumik naapinnissaannut periarfissinneqarput. Tassami Norsafe-p siulersuisui aamma piffissami tassani Nuummiimmata. Nuumminnerminni ataatsimiinnerup saniatigut Nuuk Nordisk Kulturfestival 2021-mi aaqqissuussanut tamanut ornigussinnaasimapput.
Talerpiata tungaani NAPA-p siulersuisuisa siulittaaasuat Claus Kjeld Jensen nereqatigiinnermi uaajaaernerup nalaani takuneqarsinnaavoq.
25.-28. maj 2023
Nuuk Nordisk Kulturfestival tulissaanik aasalernerani ingerlanneqassaaq. Piffissap taamaalinerani aput aareersimassaaq kiatsikkiartuaarlunilu. Qaamanerulersimassaaq illoqarfimmilu inuit qiimmakkiartoqqilersimallutik; Nuuk aalaalussaaq.
Anorersuarfiusanngitsumi taamaalillunilu timmisartut kinguartooqataanngiffianni aamma innaallagissap qamittoorfiusannginnerani festivalip ingerlanneqarnissaa qilanaaraarput.
Avataanit tikeraartussarpassuit nunat avannarliit allaneersut eqqumiitsuliortut kulturilerisullu aasaanerani Nuummukarunik silaginera peqqutigalugu amerlanernik takuniaanissaminnut tusarnaariarnissaminnullu periarfissaqassapput.
Festivali ukiut allortarlugu ingerlanneqartartoq 2015-imilli ingerlanneqartarpoq NAPA-llu 2023-mut aaqqissuuteqqilerpagu Nuummi aaqqissuussaasartut annerpaat ilaat tallimassaanik ingerlanneqassaaq uku suleqatigalugit Kommuneqarfik Sermersooq, Katuaq, Nunatta Isiginnaartitsisarfia, Nuuk Kunstmuseum aamma Nunatta Atuagaateqarfia.
- Issitor miunut sammiliviiffik, Kalaallit Nunaat, Kinaassuseq, Kulturi, Nunani avannarlerni tatiginneqatigiinneq, Nunat Avannarliit, Nutaarsiassat, Pisussat, Suliniutit
- Åbningen af Nuuk Nordisk Kulturfestival
Ingerlateqqiguk
Nutaarsiassat takunngitsoorpigit?
Suliffimmut sungiusartoq pissangasoq
Isabella H. Borg NAPA-p tusagassiortunngorniaq ilinniarnerminut atatillugu suliffimmiittuutigaa nutaaq. 2022-mi februarip aallaqqaataani aallartippoq, 2022-mi julip tungaanut uagutsinniissalluni. Maanna attaveqaqatigiinnerup iluani suliassat assigiinngitsut suliarisalereerpai – pissangagaalu piffissap sinnerata ingerlanissaa qanoq isikkoqarumaanersoq. Isabella Qaqortumi inunngorsimavoq nunatsinnilu peroriartorluni. Kujataaniinnerusimalluni. Ilinniarnerminulli atatillugu angalasimaqaaq. Meeqqat atuarfianni atuareerami AFS aqqutigalugu Portugalimiissimavoq,
Maanna Issittumi Suleqatigiinnermut Tapiissuteqartarfimmut qinnuteqartoqarsinnaalerpoq
1. december Nunani Avannarlerni Ministerit Siunnersuisoqatigiivisa issittunut aningaasaateqarfia ammarpoq. Ulloq 13. januar NAPA Issittumi Suleqatigiinnermut Tapiissuteqartarfik pillugu webinarertitsissaaq. Issittumi Suleqatigiinnermut Tapiissuteqartarfimmut ukiumut qinnuteqarnissaq maanna ammarpoq. Qinnuteqartussat nutaat qinnuteqareersimasullu aningaasaliiffigineqarnissamut maanna nittartakkatsigut qinnuteqarsinnaalereerput. Qinnuteqarnissamut piffissaliussaavoq ulloq 15. februar 2023. Aamma ullorsiutinni ulloq 13. januar nal. 10.00
Nunani Avannarlerni Siunnersuisoqatigiit nersornaasiuttagaannik nersornaaserneqarnissamik innersuussaasimasut naapikkit
Ulloq 14. April Nunani Avannarlerni Siunnersuisoqatigiit Atuakkiortunut nersornaasiuttagaannik nersornaaserneqarnissamik innersuussaasimasut atuakkiortut livestreamikkut oqaloqatigineqarneri nangeqattaartut nutaat aallartissapput. Sapaatit akunneri tamaasa atuakkiortut atuakkiaminni eqqartugaat soorlu inuunermi aniguineq, silanngajaarneq, attassuteqaatit, angalajumatussuseq, pisinnaajunnaarneq aamma allat atuakkiaminni allaaserisimasaat oqaluuserineqartassapput. Nersornaasigassatut innersuussat aamma atuffassisassapput. Ukioq manna atuakkiatik pillugit nersornaasigassatut innersuunneqartut Nunanit
NAPA kujataanut angalalersoq: Suliniutinnut taperneqarnissat pillugu naapitsigut
Eqqumiitsuliornermut kulturilerinermilluunniit suliniutimik pilersaaruteqarpit? Imaluunniit atuarfit nunat avannarlerni paarlaateqatigiikkusuppa? Taava maanna nunat avannarlerni taperneqarnissannut siunnersortinnissat periarfissaraat. Naapinnissamut attavigitigut. Septembarip aallartinneranni NAPA, Nunat Avannarlerni Piorsarsimassutsikkut Attaveqaat kujataani sumiiffinnut assigiinngitsunut atuarfiit qinnuteqarusuttunullu naapinniarlugit angalaartussaavoq. Peqatigiiffiit atorfeqarfiillu meeqqanut inuusuttunullu suliaqartartut naapikkusuppagut. Inuit ataasiakkaat assinganik suliaqartartut aamma naapikkusuppagut. Immaqa