NAPA-p sunik suliaqarnera ilarpassuasi nalugunanngilaat, kisianni kikkuuvugut? NAPA-mi nunanit avannarlernit sisamanit — Kalaallit Nunaannit, Danmarkimit, Norgemit Finlandimillu — maanna sulisoqarpoq. Ullumikkut pisortarput Susanne Andreasen ilisaritissavarput.
Susanne Andreasen Danmarkimi Århus/Randersimeersuuvoq 2008-milu Nuummut nuuppoq. Aarhus Universitetimi isiginnaartitsinermik bacheloritut ilinniarsimavoq aamma aqutsinermik ilinniarsimalluni.
Susanne NAPA-mi pisortatut 1. september 2024-mi atorfinitsinneqarpoq, Suialaa Arts Festivalimi (siornatigut Nuuk Nordisk Kulturfestivalimik taaguutilik) NAPA-p Kommuneqarfik Sermersoorlu piginneqataaffigineqartoq festivalimik aqutsisutut misilittagaqarpoq. Nunatta Isiginnaartitsisarfiani aamma 2016-imiit 2023-ip tungaanut pisortaanikuuvoq.
NAPA aamma Suialaa Arts Festival aqqutigalugit inuit eqqumiitsuliornermik kulturimillu suliniuteqartut attaveqaqatigiinnissamut periarfissaqarluarput,” Susanne Andreasen oqarpoq.
Suliniutinut qinnuteqaatit pisullu nuannersut
Ukiup aallartinnerani NAPA-p Kulturimut Tapiisarfianut Nunat Avannarliit Issittumut Tapiisarfianullu qinnuteqaatit soqutiginartut amerlaqaat. NAPA-mi sulisut, ingammik siunnersorti Pipaluk Lykke, siulersuisut naliliisartuillu avataaneersut peqatigalugit Susanne qinnuteqaatinik misissuinermik ulapputeqangaarpoq. Qiinuteqaatillu amerlasimaqaat, Nunat Avannarliit Issittumut Tapiisarfianut qinnuteqarsimasut 64-iusimapput tammannalu aatsaat taama amerlatigisunik qinnuteqartoqarsimavoq.
Januaarimi NAPA Nuummi Unnuk Kulturisiorfimmi mersornermik workshoppertitsivoq, tassani peqataasut ukiui apeqqutaatinnagit atisanik atoqqiisarlutik: ”Januaarimi Unnuk Kulturisiorfimmi mersornermik suliaqartitsigatta nuannareqaara, atisanik atoqqiilluta inuunermik nutaamik tunillugit.
Siumut qiviarneq
Susanne oqaluttuarpoq pilersaarusiorluarsimallutik, neriuutigaalu maajimiit ukiup sinnerani pilersaarutit erseqqinnerulissasut. Assersuutigalugu NAPA-p pilersinniarpaa Creative Business Network, Kalaallit Nunaanni eqqumiitsuliornermik suliaqartut tapersersorniarlugit.
Susanne ukiaru Suialaa Arts Festivalimut peqataajartornissaminut qilanaarpoq:
”Suialaami eqqumiitsulianik takutitsinerit qilanaaraakka, nuanneqaaq isiginnaartut eqqumiitsuliortullu akornanni tupinnartuliat takullugit.”
Aamma aappaagumut pilersaaruteqartoqareerpoq: 2026-mi upernaakkut NAPA-p Arctic Winter Gamesimut, Whitehorsemi Canadamiittumi marsimi 2026-mi pisussamut, Kalaallit Nunaannit kulturikkut pilersaarusiussaaq.
Inuusuttuuguit eqqumiitsuliorusuttartoq, taava kanalitsigut malinnaaffigikkit — qanittukkut AWG-mi isiginnaartitsisartunik Kalaallit Nunaannit peqataasussarsiuleruttorpugut.
Allaffiup avataani
Susanne allaffimmi sulinngikkaangami pinngortitami, ingammik Nuummi kangerlummi alianaatsumi, pisuttuartarlunilu sisorartarlunilu aalisartarpoq piniartarlunilu.
Naggataatigut Susanne aperivarput oqaaseq sorleq qallunaatut nuannarinerpaaneraa:
”Akissallugu nalunarpoq – immaqa ”velbekomme” (Takanna), soorlu nerileraanni taanna oqaaseq atorneqartarpoq, ”ajunngitsumik tigugiuk. Oqaaseq taanna oqaatsini allani tusaanikuunngilara. Oqaaseq nuannersoq qangarsuarli atorneqaraluartoq suli atorneqartarpoq.”
Susanne attavigiuk
Susanne attaveqarfigisinnaavat nunani avannarlerni attaveqaqatigiinnermut suleqatigiinnermullu, kulturikkut eqqumiitsuliornermillu suliniutinut, Creative Business Networkimut imaluunniit NAPA-p Kulturimut Tapiisarfianut aamma Nunat Avannarliit Issittumut Tapiisarfianullu tunngasunut.
Susanne qallunaatut, norskisut, svenskisut tuluttullu attavigisinnaavat.
Nutaarsiassat takunngitsoorpigit?
NAPAmi suliniutinut ataqatigiissaarisussaq sullarissoq
Maannguaq Rosing NAPAmi suliniutinut ataqatigiissaarisunngorpoq. Taanna Formel-1-imi sukkaniuttartutut sukkatigaluni aallartilluareerpoq. Ataasinngornermi aggustip 15-iani Maannguaq Rosing nuannaarluni NAPAmut iserpoq. Suliniutinut ataqatigiissaarisussatummi ulloq taanna Maannguaq sulileqqaarpoq. Maannguaq kajumissuseqarluarluni suliassaq siulleq aallartippaa. Suliassarli imaannaanngitsuuvoq. Taassumami allagarpassuit digitalinngortittussaammagit. Ullulli pingasuinnaat qaangiutereersut pappilissat tuusintilikkaat skannereerlugit suliaq naammassivaa. Maannguaq eqqissisimasuuvoq sukkasuumillu
Viktoria Joelsen Allatta! Inersimasunut ajugaasoq: Silarsuaq nutaaq alla iserfigilerpara
Atuakkiami “Qilaappali”-mi nukappiaraq 1930-kkunni Tunumi peroriartortoq oqaluttuarineqarpoq. Ukiut marluk matuma siorna NAPA-p allannermik unammisitsineq Allatta! sisamassaat aallarteqqippaa, siullermeersumillu inersimasunut unammisitsineq ingerlanneqarluni. 2023-mi decembarimi tunniussinissamut killigititaq sioqqullugu atuakkiat sisamat nassiunneqarsimapput. Atuakkianit nassiunneqartunit sisamaasunit Viktoria Joelsenip ataatami 1930-kkunni meeraanerani inuusuttuaraaneranilu Tunumi inuunera pillugu oqaluttualiaa naliliisunit tigulluarneqarpoq. Viktoria
Qinnuteqarnissamut piffissarititaasup tullia tassaavoq januarip 15-at
NAPAp Kulturimut Tapiisarfia ukioq 2023-mi aningaasaliissutissatut immikkoortitarisimasai nungupput. Taamaalilluni aamma qinnuteqarneq, decembarip 15-iat nallertinnagu qinnuteqarfiusussaagaluartoq taamaatinneqarpoq. Kulturimut Tapiisarfimmut soqutiginnittoqarsimaqaaq. Inuit amerlasuut NAPA atorluarnikuuaat, tamannalu pillugu qinnuteqartorpassuarnut tamanut qujarusuppugut. 2024-mi aningaasanik agguaasseqqinnissatsinnut qilanaarpugut, qinnuteqarnissamut piffissarititaasoq tullia pissaaq januaarip 15-ianni. 2024-mi 3.000.000 koruuninik Kulturimut Tapiisarfik aningaasaliissutissanik agguagassaqassaaq.
Team Kalaallit Nunaat Kultoorip Arctic Winter Gamesimut inuusuttut peqataasussat nanivai
Alaskami Arctic Winter Games 2024-imi ingerlasussamut nunatta kultoorikkut takutitassaanut inuttassarsiorneq taamaatippoq, inuusuttullu peqataasussat arfinillit nanineqarput. Septembarimi NAPA Tasiilamiippoq AWG-mut takutitsisussanik inuusuttunik kajumissaajartorlutillu ujaasiartorlutik. Tassani inuussuttut 21-t auditionerlutik peqataapput. Saniatigut inuusuttut nunatsinneersut periarfissaqarput digitalimik auditionernissaminnut. Inuusuttut piginnaaneqarluarput siunissamilu nutaaliorlutik suliaqalerumaartussat qularnanngillat. “Auditionerlutik videonik nassiussisut ikigisassaanngeqaat, assut