NAPA – Nunani Avannarlerni Piorsarsimassutsikkut Attaveqaat sap. ak. 46-mi Pisiffik Nuuk Centerilu suleqatigalugit nerisassanik sammisaqartitsivoq. Tamanna pivoq arfininngornermi novembarip 15-ani Nuuk Centerimi nerisassanik igitsiinnartarneq pillugu annertuumik sammisaqartitsigatta. Pisoq akeqanngilaq tamanullu ammalluni. Pisumi eqqaaginnartarneq atuisartutullu qanoq eqqaaginnarneq millisarsinnaanerlugu paasititsiniaasoqarpoq.  

PISUSSAT:

Nal. 11:00 – 11:15             NAPA-miit saqqummersitsineq Think.Eat.Save pillugu tikilluaqqusineq aammalu aqutsisumiit Ane Marie Ottosenimiit tikilluaqqusineq

Nal. 11:00 – 13:00          – Inersimasunut: igitsiinnartarnerup millisarnissaanut siunnersuuteqarit. Meeqqanut: nerisassanik igitsiinnartarneq titartaruk, Politikeri nerisassiornermullu najoqqutassamit atuakkiortoq Michael Rosing naapiguk, atuagarlu ’Tuttu – qaqqamiit qanermut’ atsiortiguk

Nal. 11:15 – 11:35             Meeqqat eqqumiitsuliaat uleerneqarneri – aqutsisut  Lisbeth Karline Poulsen aamma Ane Marie Ottosen

Nal. 11:35 – 12:35             Iggarinneqqusaannerit Ane Mariemit aallartinneqassapput

Nal. 12:35 – 12:45           Iggarinneqqusaannermi ajugaasoq suaarutigineqassaaq, Krissie Berthelsen Winberg

Nal. 12:45 – 13:00           Ajugaasunut akissarsititsineq siunnersuusiornermi Ittu.Net-imiit Michael Rosingimiillu titartaanermilu Legekæden-imiit

Nal. 13:00                          Naggasiineq

Ullormi Facebookikkut eqimattamut ”Stop madspild”-imut ilaasortanngorsinnaavusi, ulluinnarni nerisassanik igitsiinnarnerup annikillisarnissaanut Pisiffimmiit siunnersortissinnaavusi, igitsiinnartarnerullu annikillisarnissaanut nerisassiornermut ilitsersuutinik pisinnaavusi isumassarsiorlusilu.

Sap. ak. 46-mi Nuummi meeqqat atuarfii tamaasa pulaassavagut, meeqqallu nukarliit angajulliit nerisassanik igitsiinnartarneq pillugu suleqatigissallutigit. Tassani sulinerup kinguneri sammisaqartitsinermi annermi arfininngornermi novembarip 15-ani takusinnaavasi, tassanimi nukarliit eqqakkanik eqqumiitsuliaat angajulliillu iggarinneqqusaannerat takuneqarsinnaassammata.

Tamatuma saniatigut sap. ak. tamaat plakatinik saqqummersitsineq Think.Eat.Save Nuuk Centerimi ammassaaq. Saqqummersitsineq Nunani Avannarlerni Ministerit Siunnersuisoqatigiiffiata aamma Naalagaaffit Peqatigiit suleqatigiissutaat maanngannartitsisarnermi akiuiniarluni suliniummut atatillugu unammisitsinermik aallaaveqarpoq, ajugaassutaasulli 14-it saqqummersinneqartut sinerissami katersugaasivinni aamma saqqummersinneqarumaarput. Think-Eat-Savep angalanissamut pilersaarutaa aammalu nalunaarut plakatinik saqqummersitanik imalik.

Plakati ajugaassutaasoq Think.Eat.Save-p plakatimik ussassaarummik unammisitsinerani Thordis Claessenimit Islandimeersumit suliarineqarpoq.