Allannermik unammitsitsinermi NAPA-mit, milik publishingimit aammalu Kalaallit Atuakkiortut Nunattalu Atuagaateqarfia suleqatigalugit ingerlanneqartumi ajugaasut 10-t toqqarneqarput!

Naliliisuupput; siornatigut ajugaanikoq Sørine Steenholdt, ilusilersuisartoq Arny Koor Mogensen aammalu lektori Birgit Kleist Pedersen. Taakku peqatigiillutik allatat nassiunneqartut tamaasa atuarlugillu nalilersorpaat.

”Allannermi qulequtarineqartoq ”Inissaqartitsineq” peqataasut assigiinngitsorpassuartigut atorsimavaat. Taamaattorli sammisat ilaat uteqqiapput, taakkunanilu pitsaanerpaat toqqarpagut. Allatat ullumikkut nunatsinni pissutsinut pisunullu ersersitsisutut oqaatigineqarsinnaapput. Inuit soqutigisaannut, nuannersunut nuanniitsunullu. Allatani apeqqutit makku initupput: inissaqartitsineq qanoq isumaqarpa? Kimut? Immitsinnut allanullu naammattumik inissaqartitsivugut? Allatani sammineqarput inuunermik akisussaaffeqarneq, imminut, allanik pisimasunillu akuersineq, atugarlioraluarluni inuunermi ingerlariaqqinneq, tassa inuttut ajornartorsiornermiit pissusitoqqanik allannguineq. Toqqaanitsinni nutaalianik imaqarneq, oqaatsinik sannaanillu pinnguarneq atuagassiaqarnermut pitsaassutsimik qaffassaasut ukkataraagut. Tamatuma saniatigut sapinngisamik unammisitsinermi allattariaatsit tamakkerlugit toqqaaniarsarisimavugut” – taamak isumaqatigiillutik oqarput Allatta! 3.0-mi nalileereernerup martsip 9-ni ingerlanneqartup kinguninngua.

 

Ajugaasut tassaapput:

Oqaluttuaaqqat
Najannguaq Berthelsen, 18-nik ukiulik, Nuuk

Oqaluttuaaraq ”Atuaqatitaara” meerarsiamut tunngavoq, oqaluttuaaqqamilu sammineqarput kinaassuseq, kinaassusiiagaaneq, nunaqqatittalu allaanerusunit akuerinninnginnerannit isornartorsiunineq allallu.


Paninnguaq Møller, 28-nik ukiulik, Nuuk
Oqaluttuaaraq ” Nalujuakkat” inuunerup siunertaanik apeqqusiisumik ”inissaqartitsineq” sammineqarpoq, ilaatigullu sammisap pitsaanngitsortaa sammineqarluni; aappariinnermi imminnut inissaqartitsisoqarsinnaanersoq – aammalu inuiaqatigiinnit aqunneqarnerup aserorterinerata kingunerluutaanik isorinnilluni.



Navarana Lennert, 30-nik ukiulik, Nuuk
Oqaluttuaaqqami ”Inissaqartitsineq”-mi pinngortitaq sammineqarpoq; pinngortitap inissaqartitsiuaannarnera, ulluinnarni nuanniitsut, soorlu inuit nittartakkakkut attaveqatigiittarfiini pisut nuanniitsut alarlugit pinngortitamiinneq.


Onu Didriksen, 18-nik ukiulik, Nuuk
Oqaluttuaaqqami ”Inuunermi aallartinneq nutaaq”-mi isumakkeerinninneq saammasseqatigiinnerlu ilaatigut Onup sammivai. Qanoq ilaqutariit sequmikkiaartuaarsimanersut anaanaasup siusippallaamik toqunerata kingorna.


Erninnguaq Reimer, 29-nik ukiulik, Nuuk
Oqaluttuaaqqami ”Toqu akuersissummik pineq ajorpoq - Matup illua tungaani”-mi sammineqarpoq toqup inissaqartinnissaa, inuunermummi ilaammat.


Malik Sophus Schøller Jørgensen, 24-nik ukiulik, Nuuk

Maliup oqaluttuaaraliaani ”De Manglende Mellemrum”-mi apeqqutit inuunerup siunertaanik apeqqusiisut sammineqarput; uangaassuseq kinaanersoq, asanninneq suunersoq; apeqqutit sammiveqannginnermut, imminut sequtsernermut eqqaamasaarunnermullu tunngasut, kiisalu sammineqarlutik tunngavii ilisimanagit, kamanneq alisunnerlu.

Essay
Katrine Poulsen
, 26-nik ukiulik, Nuuk
Katrinep oqaluttualiaaraani ”Eqqortoq?”-mi apeqquserneqarpoq ’ilumoortoq’ sunaanersoq; qanoq inummut ataatsimut eqqortoq, inummut allamut eqqunngitsuusinnaanersoq. Sammineqarputtaaq ilaquttaniit, ikinngutiniit atuarfimmiillu inuunermi sorusunnermik aalajangiisitsiniarsarinerit; nammineq allallu isumalluaataat sunnerneqartarnersut; imminut naakkiginnittutut inissisimaneq inuiaqatigiinnilu apeqqutit allat.


Tukumminnguaq Nykjær Olsen, 30-nik ukiulik, Nuuk
Tukumminnguup oqaluttuaaraliaani ” Piumassuserinngisaminnik tappiitsut”-ni sammineqarpoq inuiaqatigiinni avissaartuunneq; ilaatigut immikkoortitsinermik, oqaatsit pillugit oqallinnermik, kinaassuseq pillugu apeqqutinik tunngaveqartoq.


Taalliorneq
Stine Buur Hvistendahl
, 25-nik ukiulik, Nuuk
Taallami ” Manipuleret”-mi Stinep allaaserai asanninneq naalliuutaasoq, asanninnermiillu aserorterisumik iperaaneq.

Kaaleeraq M. Andersen, 25-nik ukiulik, Uummannaq
Kaaleeqqap taalliani ” Inooqataavunga”-mi sammineqarput qaangiinnagaaneq inuppalaarnerunerlu.


Allatta! 3.0!-mi ajugaasut ilisaritissallugit tulluusimaarutigaarput! Allatarpassuit tigusagut takullugit qiimmallaataasimaqaaq, naliliisullu inuusuttunik toqqaanerminni assut ulapissimapput” - Mia Skifte Lynge, Allatta! 3.0-mik ingerlatsisoq

Inuusuttut 10-t maanna Tasiilami ullut sisamat allannermut pikkorissarnermi peqataasussanngorput, tassanilu Sørine Steenholdt nunallu avannarlerneersoq atuakkiortoq alla peqatigalugu allatatik sammissavaat. Utertitsivigineqassapput, siunnersorneqassapput, unamminermilu tunniussatik inerisaqqinnissaannut periarfissaqassallutik.

Allatat qulit ukiassariartulernerani milik publishingimit atuakkami ataatsimi katersorneqarlutik saqummersinneqassapput.

Septembarimi inuusuttut ilaatigut Islandimut Danmarkimullu nunani avannarlerni isumassarsiorlutik angalassapput. Ilaatigut Helsingørimi Kulturværftetimut peqataassapput, tassanilu nORD – Nordisk Litteratur festival ingerlanneqassaaq, aammalu nunani avannarlerni inuusuttut allattartut allat naapissallugit.

SIORNATIGUT ALLATTA!-MIK UNAMMISITSINERNIT ALLAASERISANIK KATERSAT


Saqqummersitsisarfik: milik publishing

Inuusuttut – nunatsinni nunarsuarmilu (2013)

Norden 2040 (2015)


Siornatigut ajugaasimasunit oqaaseqaatit:

Allattami peqataareernerma kingorna sapiissuseqarnerulerpunga allattakkakka allanut atuartittalernissaannut. Allattap kingorna misigisat nuannersimaqaat. Allannerup silarsuaa angisooq pulaffiginikuuara. Ajugaaqataanikuunera periarfissanik ammaasseqaaq. Allanneq, allanermullu tunngasut allat inuussutigisinnaalersimavakka.” – Sørine Steenholdt, Allatta 2013-mi ajugaasut ilaat.

Allattami peqataanerup nuannernerpaartarivaa nunatsinni inuusuttut allannermut soqutigisallit allat naapinnerat, taavalu allannermut periutsit pikkorissarneri. Allatami peqataanerma sulinerup tungaatigut periarfissanik ammaassiffigivaanga, soorlu maanna isiginnaagassiamut februarimi takutinneqartussamut manuskriptimik allappunga.” – Maasi Chemnitz Brøns, Allatta 2040-mi ajugaasut ilaat.



Allatta! 3.0-mik aaqqissuisuupput:

NAPA, milik publishing, Nunatta Atuagaateqarfia aamma Kalaallit Atuakkiortut

Allatta! 3.0-mut aningaasaliisuupput:
NAPA
Kommuneqarfik Sermersooq
Tips- aamma lotto-mit aningaasaliissutit - siunertanut tamanut iluaqutaasussanut (pulje C)
Namminersorlutik Oqartussat kultureqarnermut aningaasaliissutaat