18 septembarip 2020

Ukioq manna NAPA-p Nunat Avannarliit Killiit Ulluat nalliussippagu inuusuttut pilersitsisinnaasut qitiutinneqassapput. Ilaatigut Niviaq Korneliussen, Josef Tarrak aamma Pivinnguaq Mørch tamarmik eqqumiitsuliornikkut immikkut piginnaasallit peqataassapput. Nunat Avannarliit Killiit tamarmik - Island, Savalimmiut aamma Kalaallit Nunaat - unnummi eqqumiitsuliornermik samminniffiusumi oqaatsit, kinaassuseq kulturilu katersuuffigissavaat, tassani tusarnaariat isiginnaariallu ilanngutitinneqarumaarlutik. 

Nunat Avannarliit Killiit Ulluat ukiut tamaasa nunat sanileriit pingasuusut, Savalimmiut, Kalaallit Nunaat, Islandillu suleqatigiinnertik, ataqatigiissusermillu misigissuseqarnertik nalliussisarpaat. Ukialeqqaarfik nunat avannarliit killiit oqaluttuassartaannik kulturiannillu malunnartitsivigissallugu toqqarneqarsimavoq. 

Nunat avannarliit killerni nalliussineq ataatsikkut ingerlanneqassaaq, Kalaallit Nunaannilu Katuami malunnartitsineq ingerlanneqassalluni, tassannga pisut streamerneqarsinnaapput Kalaallit Nunaata sinnera Nunallu Avannarliit Killiit allat malinnaasinnaaniassammata. Taama unnussiuaartitsilluni NAPA-p, Nunani Avannarlerni Piorsarsimassutsikkut Attaveqaatip nunat pingasut akornanni kulturikkut suleqatigiinneq nalliuttorsiutigerusuppaat patajaallisarlugulu. 

NAPA-p pisortaa nutaaq, Anne Mette Gangsøy, oqaluttuarpoq:

“Nunat Avannarliit Killerni arlaannik immitsinnut atassuteqaateqarluta misigaagut. Qeqertani najugaqarpugut, pinngortitamit assingusunik periarfissaqartinneqarpugut aamma killilersugaalluta, inunnillu ikittunit oqaaserineqartunik oqaaseqarluta inunnguuseritsatsinnit.  Unnummi sammineqassapput oqaatsit, kulturi kinaassuserlu, oqaatsit inunnguuserisagut pilersitsisinnaanikkut qanoq atortarpagut”.

Eqqumiitsuliortut Nunat Avannarliit Killermiut 

Aaqqissuussinermi romanimik atuakkioqqammisoq Niviaq Korneliussen aamma  meeqqanut atuakkiortoq Pivinnguaq Mørch, marluullutik Nordisk Ministerrådip Atuakkiortunut Nersornaasiuttagaanut nersornaasigassatut innersuunneqarsimasut, oqaatsit kinaassuserlu pillugit eqqarsaatitik oqaluttuarissavaat. Nipilersortartut Josef Tarrak (GL), Katsi Kleist-Eriksen (GL), Jensia Højgaard Dam (FO) aamma Snæfrið Egilson (IS) nipilersornermut tunngatillugu oqaatsitigut kinaassuseq pillugu oqallissapput. Ullormi sammisat taamaalillutik - oqaatsit, kulturi kinaassuserlu - nipilersornikkut, atuakkiornikkut pilersitsisinnaanikkullu sammineqassapput.  

Nunat Avannarliit Killiit Ulluat 2020nunat avannarliit killerni pingasuusuni annertuumik programmeqarluni nalliussineqassaaq.  Ulloq Nunat Avannarliit Killiit Siunnersuisoqatigiiffiata pilersissimavaat, taannalu Kalaallit Nunaata, Islandip Savalimmiullu inatsisartuinit ilaasortanik 18-inik ilaasortaqarpoq. Nunanit taakkunannga tamanit inatsisartunut ilaasortat arfinillit. Taanna 1985-imi pilersinneqarpoq, siunnersuisoqatigiiffiullu sulinermini nunat avannarliit killiit soqutigisai pillugit suleqatigiinnissaq aamma Atlantikup Avannarpasissuisa isumalluutaasa kulturiisalu illersornissaat ilaatigut siunertaraa.   

Inatsisartut siulittaasuata Vivian Motzfeldtip, Nunat Avannarliit Killernut sinniisutut ilaasortanut siulersuisuusup, suleqatigiinnermut naalakkersuisoq Steen Lynge peqatigalugu ammassavaa.

Katuap pisortaa Arnakkuluk Jo Kleist naggasiivoq:

”Katuami isumaqarpugut inuit kulturimit nukissaminnik tunineqartartut. Oqaatsit inuit kulturiannut kinaassusaannullu ilaapput, taamaattumik isumaqarpugut kulturip oqaatsillu naapinnerat misissussallugu soqutiginartuusoq. Sammisaq tamanna qitiutillugu aaqqissuussineq tapersersorsinnaagatsigu nuannaarutigaarput”.

Nunat Avannarliit Killiit Ulluat 2020 peqataaffigissallugu akeqanngilaq, ulloq NAPA-mit, Nunani Avannarlerni Piorsarsimassutsikkut Attaveqaat, Katuamillu Ilinniartitaaneq, Kultureqarneq Ilageeqarneq Naalakkersuisoqarfik sinnerlugu aaqqissuussaavoq.  Aaqqissuussineq kalaallisut qallunaatullu ingerlanneqassaaq, nutserisoqarumaarporlu.

Pingasunngorneq ulloq 23. september 2020, nal. 16.30-18.30, Hans Lyngep Inersuani, Katuaq.

NAPA-p podcastianut (N)ORD immikkut immikkoortoq
Nunat Avannarliit Killiit Ulluata nalliussineqarneranut atatillugu immikkut ittumik podcastitsinnut (N)ORD-imut immikkoortuliorsimavugut, tassani islandimiut savalimmiormiullu oqaasii sammivagut, ilaatigulllu inuiaat taakku marluk imminnut paasisinnaanersut misileraaffigalugu. (N)ORD uani tusarnaaruk: Apple PodcastSpotify aamma Soundcloud imaluunniit ataatungaani linki iserfigalugu.

Nunat avannarliit killerni suleqatigiinneq soqutigigukku linkit aaku takusinnaasatit:

Nunat Avannarliit Killliit Ulluat 2020-mi pisussat tamaasa uani takukkit
https://www.vestnordisk.is/nyheder/aktiviteter-paa-vestnordisk-dag/

Nunat Avannarliit Killiit nittartagaat
https://www.vestnordisk.is

Nunat Avannarliit Killiit Siunnersuisoqatigiiffiata Facebookia
https://www.facebook.com/vestnordisk.org

Nunat Avannarliit Killiit Siunnersuisoqatigiiffiata inuusuttunut atuakkiortunut nersornaasiuttagaat 2020 pillugu atuarit
https://www.vestnordisk.is/nyheder/nominerede-til-vestnordisk-raads-boerne-og-ungdomslitteraturpris-2020-2/

Nunat Avannarliit Killiit Siunnersuisoqatigiiffiat pillugu Inatsisartut niitartagaani atuarit
https://ina.gl/udvalg/repraesentationer/vestnordisk-raad/om-vestnordisk-raad/?lang=da&fbclid=IwAR3-P4H9LNZryO0JbvN17SaGtamtRRoTdFc_zpDTpKL4ZoC-1Ikua2VAw5I

Programmi

16:30 Suleqatigiinnermut Naalakkersuisoq  Steen Lynge aamma Inatsisartut siulittaasuat  Vivian Motzfeldt ammaassapput
16:40 Pivinnguaq Mørch, atuakkiortoq
17:00 Niviaq Korneliussen, atuakkiortoq
17.20 Unillatsiarneq
17.25 Erinarsorneq, tusarnaartut peqatigalugit
17.40 Scenemi oqaloqatigiinneq  – nipilersornikkut oqaatsitigut kinaassuseq
• Josef Tarrak, Kalaallit Nunaat
• Katsi Kleist-Eriksen, Kalaallit Nunaat
• Jensia Højgaard Dam, Savalimmiut
• Snæfríð Egilson, Island
• Aqutsisoq: Laura Lennert Jensen
18.25 Ullumi qujajanq, kulturimut Naalakkersuisuugallartoq naggasiissaaq

Immikkoortoq 3: Islandimiu savalimmiormiusut paasisinnaava?

(N)ORD-ip immikkoortuata pingajuanni islandimiusut savalimmiusullu oqaatsit, Nunat Avannarliit Killiit Ulluannut 2020-mut atatillugu sammissavagut. Oqaatsit allat oqaasiinit akusaannginnissaat sammissavarput, aamma sooq islandimiut savamlimmiormiullu oqaatsiminnut allamiut oqaasiinik imaaliallaannarlutik ilanngussineq ajornerat, namminerli nutaanik oqaatsinik nassaassarsiorusuttarnerat misissussavarput, aamma inuiaat taakku marluk imminnut qanoq paasitigsinnaanerat misilerassavarput. 

Peqataasut tassaapput Jensia Højgaard Dam Davidsen, Snæfríð Egilson aamma Ann-Sofie Gremaud.