17 decembarip 2020

NAPA-p peqataaffigisaanik allannermut workshoppini marlunni sulineq inuummaarippoq. Allaaserinnikkusunneq, oqaatsit pillugit alapernaassuseqarneq inuusuttut peqataasut takutippaat. Workshoppi siulleq Katuamiippoq aappaalu Nuummi gymnasiami GUX-imiilluni.

Nina Thomsen, GUX-imi ilinniartitsisoq workshop pillugu ima oqarpoq:

“Ilinniartut allannissaannut periarfissinneqarnerat aamma peqataalluarlutik allaaserisaqartut takullugit nuannerpoq. Ilinniartut arlallit oqaatsimikkut imminni nutaamik paasisaqartut erserpoq. “Malittarisassaqannginneq” namminnerlu qanorluunniit allaannarsinnaanertik assut nuannarivaat.”

Inuup assingi 100-t
Allannermut workshoppit Charlotte Lakitsip aallartitarai, taanna Kalaallit Nunaanni arlalinnik kulturikkut suliniuteqartarsimavoq. Ilaatigut peqataaffigisimavaa Nuuk Nordisk Kulturfestival 2019, tassani NAPA-mit Kulturimut tapiisarfianit aningaasaliiffigineqarsimalluni. Maanna suliniuteqarnermini “Who We Are”, Kalaallit Nunaanni maanna inuusuttut kikkuunersut aperai.

“Inuup assingi 100-t”-mik taallugu suliniummi kinguaarit maanna inuusuttuusut assinginik 100-nik katersinissaq anguniagaavoq. Nuummi inuusuttuni assigiinngiiaartuuneq nukissallu takutinneqassapput. Allasserinnilluni aamma assiliineq atorlugu inuup assingi - Charlottemit assilisat aamma inuusuttunit nammineq allaaserisat.

Nuummi inuusuttut pillugit piviusulersaarummik aallarnerneqarpoq, kalaallit pillugit isummanut pigiuliutiinnarneqarsimasunut aamma kusanartuinnarnik assiliisarnermut akerliussutut.

“Frankrigimeersuuvunga, tappavanilu nunanni innuttaasut Kalaallit Nunaata inuinik isiginninnerat piviusunut ungasissorujussuuvoq. Pissanganarsagaavoq, alianaallisagaalluni, ilumoortuunani. Assiliisartut amerlanerpaat Kalaallit Nunaannukartarput sivikitsuinnarmillu nunamiittarlutik, pinngortitarsuarmi assiliisarput innuttaasullu oqaloqatiginagit,” Charlotte Lakits oqaluttuarpoq.

Allanneq nukiuvoq sakkortooq
Allaaserinnitussat allartinniarneranni ikiorniarlugit atuakkiortut Pivinnguaq Mørch (KAL) aamma Per Bloch (QALL) qaaqqusimavai. Taakku peqatigiillutik Nunatta Atuagaateqarfia suleqatigalugu Nuummi allannermut workshoppeqartitsisimapput. Pivinnguaq Mørch Nunat Avannarliit Siunnersuisoqatigiivisa Atuakkiortumut Nersornaasiuttagaanut siusinnerusukkut innersuunneqarsimasoq, meeqqanut atuakkiortarpoq, oqaluttualiortarluni taalliortarlunilu. Per Bloch eqqumiitsuliornermik suliaqarnermi saniatigut NAPAmi attaveqaqatigiinnermut akisussaasuuvoq taamaalillunilu NAPAp kulturimut tapiisarfianit immikkut ittumik taperneqarsimanani, allannermulli atatillugu suliffimmut aningaasaliissutaareersut aqqutigalugit aningaasaliiffigineqarsimalluni.

Peqataasut allannermut piukkunnarsarneranni Pivinnguaq Mørch aamma Per Bloch nammineq allakkaangamik suleriaatsit atukulanerusatik pillugit saqqummiipput, saqqummersitatik takutissorlugit allannerminnilu piffissap ingerlanerani susoqartarnersoq nassuiaatigalugu. Peqataasut namminneq aalajangerpaat kalaallisut, tuluttut danskisulluunniit allassanerlutik.

“Neriuppunga inuusutttut eqqaamassagaat sukkulluunniit ingeriarlutik allassinnaanertik. Kamakkunik nuannaarunik – qanorluunniiimmi misigigaluarunik eqqarsaraluarunilluunniit allassinnaajuaannarpaat, annillugu. Oqaatsit-uku pingaaruteqartut isumaqarpungalu oqaatsit atorlugit paasisitsisinnaaneq nukiusoq sakkortooq,” Charlotte Lakits naggasiivoq.

Charlotte Lakits-ip nittartagaa uani takuuk

Pivinnguaq Mørch-ip oqaluttualiat taalliaalu, “Arpaatit qaqortut”, Nunat Avannarliit Siunnersuisoqatigiivisa Atuakkiortumut Nersornaasiuttagaanut innersuunneqarsimasoq pillugu allaaserisaq uani takuuk

Per Bloch-ip ”spoken word”-imik taallugu oqaatsit oqaatigineqartut pillugu suliniutaa “Vi skal noget sammen”, Kalaallit Nunaanni kalaallit arlallit peqatigalugit pilersinneqartumut paasissutissat uani takukkit

Assiliisut: NAPA