9 septembarip 2020

Nuummi ukiut tamaasa filmertitsinerni pisartut annersaat festivaali kingumut takkuteqqippoq, COVID-19 pissutigalugu nutaanik programmeqalerlunilu websidetaartoq

Nuuk International Film Festival (NIFF) 2017-imi aallarnerneqarpoq tamassumalu kingunerisaanik ukiut tamaasa oqallinnernik, workshoppinik, masterclassinik allanillu annertusiartortinneqarluni. 2020-mi festivali isiginnaagassianut nunarsuarmut tamarmut ammaanneqarpoq. Nunanit assigiinngitsunit 120-nit isiginnaagassianik 3000-it sinnilinnik filmfestivali nassiussiffigineqarpoq massakkumullu programmi annerpaaq 76-inik quppernilik tamanut saqqummiunneqaqqammerluni.

Festivalimut piareersaatit COVID-19-imut aarlerinermik sunnerneqarnikuupput, festivalillu qanoq isikkoqarluni ingerlanneqarnissaa sivisuumik nalunarnikuuvoq:

"Festivalip timitalimmik ingerlassinnaanissaa annoraaminersuarmilu isiginnaagassiat takutinnissaat nuannaarutigisorujussuuagut. Nunanit assigiinngitsunit aggertussat nunarsuaq tamakkerlugu tunillaassuunneq pissutigalugu aggersinnaanngitsut taarsiullugu videolinkikkut peqataassapput, taamaasilluta atit nuimasut Nuummut tikilluaqqusinnaavagut", festivalip ingerlatsisua Pipaluk K. Jørgensen oqarpoq.

Nuuk International Film Festival ilaatigut NAPA-mit, Kommuneqarfik Sermersuumit, Air Greenlandimit NunaFondimiillu tapersersorneqarpoq, Katuaq, Filmiliortarfik FILM.GL-ilu suleqatigalugit aaqqissuunneqarluni.

Nuuk International Film Festival 2020 septembarip 16-ianit 19-ianut 2020-mi ingerlanneqassaaq

www.niff.gl ikkut allanik takusaqarit programmilu aallugu

https://www.facebook.com/  watch/?v=661874734447480&  extid=kBDUebLbPYajOLCq