Matumuuna Nunani Avannarlerni Piorsarsimassutsikkut Attaveqaat NAPA Nordregio Ilisimatusarfillu suleqatigalugit aaqqissuussinermut matumunnga qaaqqusivoq. Nunanut avannarlernut atatillugu Kalaallit Nunaata assigiinngitsutigut saqqummiunneqartarnera tamaani sammineqassaaq.

Ukiut tamaasa Nordregiop nalunaarusiaq State of the Nordic Region saqqummersittarpaa. Nalunaarusiami tassani inuiaqatigiit iluanni pisuussutsinut tunngasut pingaarnerit pillugit paasissutissat kisitsisillu saqqummiunneqartarput. Tamakkua ilagaat inuiaqatigiit agguataarnerisa allaatigisaanerat, aningaasaqarneq, sulisut ilinniagaqarnerlu, aammalu pinngortitami pisuussutsit, digitalisering, peqqissuseq atugarissaarnerlu, kiisalu piorsarsimassuseq eqqumiitsuliornerlu.
Nalunaarusiaq 2018-imi saqqummersoq ugguuna aasinnaavat.

Saqqummersitsinermut atatillugu nalunaarusiaq nunani avannarlerni tamani tamanut ammasumik ataatsimiisitsinerni saqqummiunneqartarpoq – augustip 7.-ni Kalaallit Nunaanni tamanna pissaaq.

QAQUGU:  7. august 2018, 13:00-16:30 
SUMI: Ilimmarfik, Nuuk.

PISUSSAT:

1) Nordregiop State of the Nordic Region saqqummiutissavaa, pingaarnertut sammisaralugit Kalaallit Nunaanni inuiaqatigiit ineriartornerat, inuit nutserarnerat, suliffeqarneq kiisalu pinngortitami pisuussutsinut tunngatillugu periarfissat. Saqqummiisoq: Karen Refsgaard, Nordregiomilu pisortamut tullersorti ilisimatusarnikkullu pisortaq

2) ”Kalaallit Nunaanni Issittullu sinnerani inuunermi atukkat atugarissaarnerlu pillugit misissuineq” Saqqummiisoq: Birger Poppel – Affiliated researcher, Department of Cultural and Social History

3) Kalaalimerngit pisariaqartippagut? – kalaalimerngit, kinaassuseq piorsarsimassuserlu pillugit. Saqqummiisoq: Naduk Lund Olsen Phd.

Aaqqissuussineq akeqanngilaq, tamanullu ammalluni. Peqataaniaruit nalunaaqqaartariaqanngilatit.

Aggialluarisi!

  

NORDREGIO PILLUGU:
Nordregio Nunani Avannarlerni Europamilu nunap iluani inerisaanermi pilersaarusiornermilu ilisimatusarfiit siuarsimanersaat ilagaat.
Nordregio Nunani Avannarlerni Ministerit Siunnersuisoqatigiivisa pilersitaraat. Angusassat tunaartaralugit ilisimatusarnikkullu paasisat atorlugit suleriaaseqarpoq, sammisallu nalitsinnut pingaarutillit sammisaralugit. Nordregio suleriaatsimini ilisimatusarnermi soqutigisat aallaavigisarpai, aammali oqartussaasut sammineqartunillu ilisimannilluartut soqutigisaat aallaavigisarlugit.

Nordregiop akisussaaffiisa pingaarnerpaat ilagaat Nunani avannarlerni nunat iluini politikkikkut inerisaaneq piujuartitsisumillu ineriartortitsineq.