Ataasinngorneq septembarip 26-at 2016 nal. 15.00
Katuap Inersuaaraani, Imaneq 21, 3900 Nuuk

Pisussat
15.00     Tikilluaqqusineq ilisarititsinerlu: Mats Bjerde, NAPAmi pisortaq
15.10     Nina Kreutzmann erinarsussaaq
15.15    Norden i Skolen pillugu Marie Nørskov Bærentsen, Foreningerne Nordens Forbund saqqummiissaaq
15.35    Nordplus Juniorimut qinnuteqarnissamut periarfissat; Najaaraq Egede, NAPA
15.45    Nina Kreutzmann erinarsussaaq
15.50    Norden i Skolep kalaallisoortaata qanoq iserfigineqarsinnaanera atorneqarsinnaaneralugu pillugit misiligaaneq apeqqutillu

Nunani Avannarlerni ilinniarnermut isaaffissaq, Norden i Skolen, 2012-iminngaanniik oqaatsini arfinilinni piunikuusoq, maanna kalaallisut atuartitsinermi atorsinnaanngorpoq. Norden i Skolen NAPA – Nunani Avannarlerni Piorsarsimassutsikkut Attaveqaat suleqatigalugu kalaallisuunngortinneqartoq ilinniartitsisut atuartullu Kalaallit Nunaanni tamarmiittut iluaqutigisinnaalerpaat.  Tamanna Nuummi Katuami nuannersumik saqqummiussinermik septembarip 26-ani malunnartinneqassaaq, ilaatigut Nina Kreutzmann Jørgensen erinarsussalluni.

Norden i Skolen nunani avannarlerni ilinniarnermut isaaffiusuni annertunersaavoq, ilinniartitsisunut atuartunullu nunani avannarlerni oqaatsinik piorsarsimassusimullu aamma silap pissusaanut pinngortitamullu tunngasunik suliaqarnissamut periarfissiisoq.  Isaaffimmi atuagassat, suliassat, isiginnaagassiat nunanilu avannarlerni suliat meeqqat atuarfiannut ilinniartuunngorniarfinnullu naleqqussagaapput.

– Neriuppugut ilinniartitsinissamut neqeroorutip nunani avannarlerni suleqatigiinneq nukittunerulersikkumaaraa, kalaallimmi ilinniartitsisut atuartullu Norden i Skolenimi atortussat atulersinnaajumaaramikkit, assersuutigalu ikinngutigiittut klasseqalernissat, unammisitsinernut peqataanerit, aammalu Nordisk Skolechat-imut ilaanissaq, Thomas Henriksen, Norden i Skolenimi pilersaarusiornermut pisortaq oqarpoq.

Norden i Skolen kalaallisuunngortinneqarpoq nunani issittormiuni ilinniartitsinissamut periarfissanik pitsaanerutitsilernissamut aammalu issittormiut pillugit nunani avannarlerni atuartunut paasisimasaqartitsinerulernissamut aallarnisaataasussatut. Oqaatsit ukunaneersut atorneqareerput: Sverige, Danmark, Norge, Finland aamma Island. Maannakkut Norden i Skolen kalaallisuunngortinneqarnermi saniatigut savalimmiutuunngortinneqarportaaq. Saamit avannarliit oqaasii atorlugit aamma piffissami qaninnermi nutserneqarsimasunngussaaq.

– Norden i Skolenip kalaallisuunngortinneqarneratigut kalaallit ilinniartitsisut najoqqutassanik nunani avannarlerninngaanneersunik periarfissaqarneruliinnaratik, aammali atuartut nunani avannarlerniittut pissanganartumik oqaatsitigut piorsarsimassusikkullu kalaallinik naapeqateqartalernissamut periarfissaqalerput. Tamanna qilanaarilluarparput, Thomas Henriksen oqarpoq, ilanngullugulu oqaatigalugu Norden i Skolen nunat issittut nalaagaaffeqatiigiillu pillugit najoqqutassanik nutaanik pissanganartunillu ukiami saqqummertoqassasoq.

Norden i Skolen kalaallisut ilisaritinneqalerpat Nina Kreutzmann Jørgensenip tusarnersumik erinarsornera tusaaneqarsinnaajumaarpoq, isaaffiillu misissuataarnissaanut periarfissaqassalluni. Norden i Skolen pilersinneqarpoq Foreningerne Nordens Forbund-iminngaanniik, NordRegio aammalu Nordisk Ministerråd tapiisoralugit. Najoqqutassat atorsinnaalikkit nordeniskolen.org-imi atuisunngorlutit.

Norden i Skolen NAPA suleqatigalugu Nuummi Katuap inersuaaraani ilisaritinneqassaaq septembarip 26-ani nal. 15.00-16.00.